काठमाडौं, साउन २६ गते । राष्ट्रिय स्वतन्त्र पार्टी (रास्वपा) गण्डकी प्रदेश समितिले अन्तर्राष्ट्रिय युवा दिवसको अवसरमा प्रदेशका विभिन्न जिल्लामा युवाकेन्द्रित कार्यक्रम आयोजना गर्ने भएको छ।

पार्टीले सार्वजनिक गरेको कार्यक्रम तालिकाअनुसार प्रदेश समितिको आयोजनामा पोखरामा ‘युवा संवाद’ कार्यक्रम सञ्चालन गरिनेछ। रास्वपा प्रमुख सचेतक तथा पूर्वमहामन्त्री कवीन्द्र बुर्लाकोटीका अनुसार कार्यक्रममा युवाका सवाल, अवसर, चुनौती तथा समसामयिक विषयमा छलफल गरिनेछ।

कास्की जिल्ला समितिले पोखरा कारागारमा बृहत् सरसफाइ, नीति मन्थन तथा जेनजी आन्दोलनका क्रममा थुनिएका कैदीबन्दीसँग भेटघाट गर्ने कार्यक्रम तय गरेको छ।

युवालाई सामाजिक उत्तरदायित्व तथा सार्वजनिक सरोकारका विषयसँग जोड्ने उद्देश्यले कार्यक्रम आयोजना गर्न लागिएको रास्वपाले जनाएको छ।

कुन जिल्लामा के कार्यक्रम ?

रास्वपाका अनुसार स्याङ्जामा युवा प्रोत्साहन कार्यक्रम, रक्तदान तथा वृक्षरोपण गरिनेछ। पर्वतमा रक्तदान, वृक्षरोपणसँगै लागुऔषध दुर्व्यसनविरुद्ध सचेतना कार्यक्रम सञ्चालन गरिनेछ।

तनहुँमा नीति मन्थन कार्यक्रम आयोजना गर्ने तयारी छ भने नवलपुरमा स्वास्थ्य शिविर, रक्तदान, वृक्षरोपण तथा सरसफाइ कार्यक्रम सञ्चालन गरिनेछ।

त्यस्तै, लमजुङमा सरसफाइ तथा वृक्षरोपण र म्याग्दीमा युवा प्रोत्साहन कार्यक्रम तथा सरसफाइ अभियान सञ्चालन गर्ने तयारी गरिएको छ।

बागलुङ र गोरखामा कार्यक्रमबारे निर्णय हुन बाँकी रहेको पार्टीले जनाएको छ। मनाङ र मुस्ताङमा पनि कार्यक्रम आयोजना गर्ने तयारी भए पनि मिति र कार्यक्रमको स्वरूप भने टुंगो लाग्न बाँकी छ।

सामाजिक उत्तरदायित्वसँग जोड्ने उद्देश्य

रास्वपाले अन्तर्राष्ट्रिय युवा दिवसका अवसरमा आयोजना हुने कार्यक्रममार्फत युवालाई सामाजिक सेवा, वातावरण संरक्षण, स्वास्थ्य सचेतना, लागुऔषधविरुद्धको अभियान तथा नीतिगत बहसमा सहभागी गराउने उद्देश्य राखेको जनाएको छ।

पार्टीका अनुसार युवा सहभागितालाई राजनीतिक गतिविधिमा मात्र सीमित नराखी सामाजिक उत्तरदायित्व र सार्वजनिक सेवासँग जोड्ने उद्देश्यले जिल्लास्तरमा विभिन्न कार्यक्रम आयोजना गर्न लागिएको हो।

Originally published on abcnews.com.np.