चितवन । अण्डाको माग बढेसँगै नेपाल लेयर्स कुखुरापालक संघले आजदेखि लागू हुने गरी अण्डाको समर्थन मूल्य बढाएको छ।

बर्डफ्लुको संक्रमण नियन्त्रणमा आए पनि कुखुराको उत्पादन घटेकाले बजारमा अण्डाको माग बढेको र सोही आधारमा समर्थन मूल्य वृद्धि गरिएको संघका अध्यक्ष विनोद पोखरेलले जानकारी दिए।

संघका अनुसार एक्सएल अण्डाको समर्थन मूल्य प्रतिक्रेट (३० वटा) ५६० रुपैयाँ कायम गरिएको छ। त्यस्तै, ठूलो अण्डाको ५४५ रुपैयाँ, मिडियम अण्डाको ५०० रुपैयाँ र सानो अण्डाको प्रतिपेटी (सात क्रेट) ३ हजार रुपैयाँ समर्थन मूल्य तोकिएको छ।

फार्महरूले उपलब्ध गराएको मूल्यका आधारमा समर्थन मूल्य निर्धारण गरिएको संघले जनाएको छ।

अध्यक्ष पोखरेलका अनुसार बर्डफ्लुको संक्रमण हटे पनि त्यस क्रममा ठूलो संख्यामा कुखुरा मरेका कारण उत्पादन घटेको छ। उत्पादन घटेसँगै बजारमा अण्डाको माग बढेको उनको भनाइ छ।

तर, माग बढे पनि किसानले उत्पादन लागतअनुसार मूल्य पाउन नसकेको पोखरेलले बताए। उनका अनुसार अण्डाको लागत मूल्य प्रतिगोटा १९ रुपैयाँ १२ पैसा पर्छ। यस हिसाबले एक क्रेट अण्डाको लागत करिब ५७३ रुपैयाँ ६० पैसा पुग्छ।

बर्डफ्लुले किसानलाई ठूलो क्षति

बर्डफ्लुका कारण ठूलो क्षति व्यहोर्नुपरेको र उत्पादन लागतअनुसार अण्डाको मूल्य नपाउँदा किसानहरू पछिल्ला केही वर्षदेखि कुखुरापालन व्यवसायबाट पलायन हुन थालेको अध्यक्ष पोखरेलले बताए।

रोगको संक्रमण, उत्पादनमा आएको कमी र बजार मूल्यमा हुने उतारचढावका कारण किसान बैंक ऋणमा निर्भर हुनुपर्ने अवस्था आएको उनको भनाइ छ।

बर्डफ्लुका कारण कतिपय किसानका कुखुरा मरेका थिए भने अण्डाले उचित मूल्य नपाउँदा थप आर्थिक क्षति व्यहोर्नुपरेको संघले जनाएको छ।

Originally published on abcnews.com.np.