काठमाडौं । झापा इनर्जी लिमिटेडको १० मेगावाट क्षमताको सौर्य विद्युत् आयोजनाबाट पुनः पूर्ण क्षमतामा विद्युत् उत्पादन सुरु भएको छ।

कम्पनीका अनुसार झापा जिल्लाको बुद्धशान्ति–४ स्थित आयोजनाबाट बुधबारदेखि पूर्ण क्षमतामा विद्युत् उत्पादन भइरहेको हो। गत जेठ १८ गते आयोजनामा जडान गरिएका दुईवटा ५ मेगावाट क्षमताका इन्भर्टरमध्ये एउटामा आगलागी भएपछि विद्युत् उत्पादन अवरुद्ध भएको थियो।

आगलागीबाट क्षति भएको इन्भर्टरको मर्मतसम्भार सम्पन्न भएपछि आयोजनाले राष्ट्रिय प्रसारण प्रणालीमा पुनः १० मेगावाट क्षमतामा विद्युत् आपूर्ति सुरु गरेको कम्पनीले जनाएको छ।

मर्मतपछि उत्पादन सामान्य

कम्पनीका अनुसार आवश्यक मर्मतसम्भार तथा परीक्षण पूरा भएपछि आयोजनाको विद्युत् उत्पादन पूर्ण रूपमा सामान्य अवस्थामा फर्किएको छ।

झापा इनर्जीको उक्त सौर्य आयोजना नेपालका ठूला सौर्य विद्युत् आयोजनामध्ये एक हो। आयोजनाबाट उत्पादित विद्युत् राष्ट्रिय प्रसारण लाइनमार्फत आपूर्ति हुँदै आएको छ।

कम्पनीले अब आयोजनाबाट नियमित रूपमा पूर्ण क्षमतामा विद्युत् उत्पादन तथा आपूर्ति हुने जनाएको छ।

Originally published on abcnews.com.np.