ओखलढुंगा । सिद्धिचरण नगरपालिका–५ डाँडाखर्क गाउँमुनिबाट दुई दशकदेखि निरन्तर झरिरहेको पहिरो नियन्त्रण हुन नसक्दा पाँच घरपरिवार उच्च जोखिममा परेका छन् । सिस्नेखोलाको कटानबाट सुरु भएको पहिरो दिनप्रतिदिन फैलिँदै जाँदा स्थानीय जोखिम मोलेरै बस्न बाध्य छन् ।

पहिरोले घरबाससँगै सयौँ रोपनी खेतीयोग्य जमिन बगाएर बगरमा परिणत गरेको छ । डेढ दशकअघि चुप्लु गाउँमा पहिरोले घरखेत गुमाएपछि डाँडाखर्कमा बसाइँ सरेका राईबहादुर राईको घरसम्मै अहिले पहिरो आइपुगेको छ । ‘उतिबेला चुप्लुमा पहिरोले उठिबास लगायो, अहिले फेरि यहीँ घर बगाउने अवस्था आयो,’ उनले भने ।

स्थानीयका अनुसार पहिरोको शिरमै गाउँ रहेकाले पाँच घरसँगै थप करिब ४० परिवारसमेत जोखिममा छन् । पहिरो नियन्त्रणका लागि स्थानीय तह, प्रदेश र संघीय सरकारसँग पटक–पटक आग्रह गरिए पनि प्रभावकारी काम हुन नसकेको उनीहरूको गुनासो छ ।

पहिरोले खेतीयोग्य जमिन बगाए पनि भूमिकर भने तिर्नुपरिरहेको स्थानीयको गुनासो छ । पहिरोपीडित गीतामाया राईले राज्यले तिरो लिने तर राहत तथा पहिरो नियन्त्रणका लागि प्रभावकारी काम नगरेको बताइन् ।

डाँडाखर्कको समस्या ओखलढुंगा जिल्लाका दर्जनौँ पहिरो प्रभावित क्षेत्रको प्रतिनिधि समस्या हो । स्थानीयले दीर्घकालीन प्राविधिक समाधान, जोखिममा रहेका परिवारको सुरक्षित पुनःस्थापना र जीविकोपार्जन संरक्षणका लागि तीनै तहका सरकारसँग तत्काल पहल गर्न माग गरेका छन् ।

Originally published on abcnews.com.np.