एमाले बागमती संसदीय दलका नेता थपलियाविरुद्ध अविश्वास प्रस्ताव दर्ता

बागमती । नेकपा (एमाले) बागमती प्रदेश संसदीय दलका नेता जगन्नाथ थपलियालाई हटाउने प्रक्रिया औपचारिक रूपमा अघि बढेको छ।

एमालेका एक प्रदेशसभा सदस्यका अनुसार बुधबार संसदीय दलको कार्यालयमा थपलियाविरुद्ध अविश्वास प्रस्ताव दर्ता गरिएको हो।

पार्टी नेतृत्वको निर्देशनअनुसार संसदीय दलको नेतृत्व परिवर्तन गर्ने उद्देश्यले प्रस्ताव दर्ता गरिएको ती सांसदले बताएका छन्।

किरण थापालाई नयाँ दलको नेता बनाउने तयारी

थपलियालाई हटाएर पूर्वस्वास्थ्यमन्त्री किरण थापालाई संसदीय दलको नयाँ नेता बनाउने तयारी भइरहेको एमालेका ती सांसदले बताए।

उनका अनुसार नयाँ नेता चयनका लागि आवश्यक बहुमत प्रदेशसभा सदस्यको हस्ताक्षरसमेत संकलन भइसकेको छ।

अब संसदीय दलको बैठकबाट थपलियामाथिको अविश्वास प्रस्ताव तथा नयाँ नेता चयनसम्बन्धी प्रक्रिया अघि बढ्ने बताइएको छ।

बागमती प्रदेश सरकारबाट एमालेले समर्थन फिर्ता लिएपछि प्रदेशको राजनीतिक अवस्था थप जटिल बनेको छ।

सरकारबाट समर्थन फिर्ता लिएलगत्तै एमालेले आफ्नै संसदीय दलको नेतृत्व परिवर्तनको प्रक्रिया अघि बढाएको हो।

एमालेको यो कदमसँगै बागमती प्रदेशको सत्ता समीकरणमा थप परिवर्तन आउन सक्ने देखिएको छ। संसदीय दलको नेतृत्व परिवर्तन भएमा प्रदेश सरकार गठन तथा आगामी राजनीतिक सहकार्यमा समेत त्यसको प्रभाव पर्न सक्नेछ।

Originally published on abcnews.com.np.