काठमाडौं । राष्ट्रिय सभाका अध्यक्ष नारायणप्रसाद दाहालले नवनियुक्त प्रमुख निर्वाचन आयुक्त मानबहादुर कार्की तथा निर्वाचन आयुक्तद्वय गुरुप्रसाद वाग्ले र डा. राजीव सुब्बासँग शिष्टाचार भेट गरेका छन्।

सिंहदरबारस्थित अध्यक्षको कार्यकक्षमा बुधबार भएको भेटमा अध्यक्ष दाहालले नवनियुक्त प्रमुख निर्वाचन आयुक्त र आयुक्तहरूलाई बधाई दिँदै सफल कार्यकालको शुभकामना व्यक्त गरे।

अध्यक्ष दाहालले निर्वाचन आयोगले आफ्नो जिम्मेवारी निष्पक्ष, सन्तुलित र प्रभावकारी रूपमा पूरा गर्ने विश्वास व्यक्त गरे। उनले निर्वाचन प्रक्रियालाई विश्वसनीय बनाउन आयोगको भूमिका महत्वपूर्ण हुने बताए।

भेटका क्रममा अध्यक्ष दाहालले राष्ट्रिय सभामा सुदूरपश्चिम प्रदेशबाट प्रतिनिधित्व गर्ने एक सदस्य पद रिक्त रहेको स्मरण गराउँदै उक्त पदका लागि निर्वाचन प्रक्रिया अघि बढाउन आग्रह गरे। उनले सरकार तथा सम्बन्धित सरोकारवाला निकायसँग आवश्यक समन्वय गरी निर्वाचन प्रक्रिया यथाशीघ्र अगाडि बढाउन अनुरोध गरे।

प्रमुख निर्वाचन आयुक्त कार्कीले संविधान तथा प्रचलित कानुनको अधीनमा रही निर्वाचन आयोगको जिम्मेवारी प्रभावकारी रूपमा पूरा गर्न आफूले कुनै कसर बाँकी नराख्ने प्रतिबद्धता व्यक्त गरे।

Originally published on abcnews.com.np.