काठमाडौं । प्रहरी महानिरीक्षक दानबहादुर कार्कीले सार्वजनिक निकायका बैठक तथा छलफलमा प्रस्तुत गरिने अभिव्यक्ति मर्यादित र तथ्यमा आधारित हुनुपर्ने बताएका छन्।

बुधबार प्रतिनिधिसभाअन्तर्गतको सार्वजनिक लेखा समितिको बैठकमा बोल्दै महानिरीक्षक कार्कीले वर्षौँदेखि इमानदारीपूर्वक जिम्मेवारी निर्वाह गरिरहेका कर्मचारीमाथि बिना आधार आरोप लगाउने प्रवृत्तिले उनीहरूको मनोबल र कार्यसम्पादनमा असर पार्ने बताए।

प्रहरी प्रशासनमाथि पर्ने विभिन्न उजुरी तथा निवेदनको प्रसंग उल्लेख गर्दै उनले सबै विषयलाई एउटै दृष्टिकोणबाट हेर्न नहुने धारणा राखे। जिम्मेवार पदमा बसेर बोल्दा शब्द र व्यवहारमा संवेदनशीलता अपनाउनुपर्ने उनको भनाइ थियो।

उनले तथ्यहीन आरोप लगाउने प्रवृत्तिप्रति असन्तुष्टि व्यक्त गर्दै सार्वजनिक निकायका बैठक कुनै व्यक्तिमाथि जथाभावी आरोप लगाउने स्थान नभएको बताए।

‘आजसम्म निष्ठापूर्ण काम गरेको मान्छेलाई ल्याएर यहाँ जे मन लाग्यो त्यही भन्ने ठाउँ होइन होला। कुनै पनि ठाउँको सामान्य मर्यादा हुन्छ,’ महानिरीक्षक कार्कीले भने।

उनले प्रहरी प्रशासनसँग सम्बन्धित उजुरीहरू पनि विभिन्न निकायमा पर्ने गरेको उल्लेख गर्दै सबै निवेदनलाई समान ढंगले प्रस्तुत गर्दा काम गर्न कठिन हुने बताए।

बैठकमा सांसद खगेन्द्र सुनारलगायतका सांसदहरूले नेपाल प्रहरीसँग सम्बन्धित विषयमा प्रश्न तथा आरोप उठाएका थिए। त्यसक्रममा महानिरीक्षक कार्कीले छलफलमा शिष्टता कायम राख्न र संस्थागत मर्यादालाई ध्यान दिन सम्बन्धित पक्षको ध्यानाकर्षण गराएका हुन्।

Originally published on abcnews.com.np.