काठमाडौँ । सभामुख डोलप्रसाद (डिपी) अर्यालले पर्यटन क्षेत्र मुलुकको अर्थतन्त्रको मेरुदण्ड भएको बताउनुभएको छ।

नेपाल एसोसिएसन अफ टुर एण्ड ट्राभल एजेन्ट्स (नाट्टा)को ५९औँ वार्षिक साधारणसभाको शुक्रबार उद्घाटन गर्दै सभामुख अर्यालले विदेशी मुद्रा आर्जनको महत्वपूर्ण माध्यम पर्यटन क्षेत्रको विकासका लागि सम्बन्धित सबै पक्ष सक्रिय हुनुपर्नेमा जोड दिनुभयो।

उहाँले पर्यटन क्षेत्रमा रहेका नीतिगत तथा संरचनागत समस्या समाधान गर्न सरकार गम्भीर हुनुपर्ने बताउनुभयो। पर्यटन उद्योगको विकास र प्रवर्द्धनमा नाट्टाजस्ता व्यावसायिक सङ्गठनले पनि प्रभावकारी भूमिका निर्वाह गर्नुपर्ने उहाँको भनाइ छ।

सभामुख अर्यालले राष्ट्रिय ध्वजावाहक नेपाल वायुसेवा निगम र नेपाल पर्यटन बोर्डले देशको आर्थिक उन्नयनसँग प्रत्यक्ष जोडिएको पर्यटन क्षेत्रको विकासमा इमान्दारीपूर्वक काम गर्नुपर्नेमा जोड दिनुभयो।

उहाँले पर्यटनलाई थप व्यवस्थित र प्रभावकारी बनाउन सरकार, निजी क्षेत्र तथा व्यावसायिक सङ्गठनबीच सहकार्य आवश्यक रहेको बताउनुभयो।

Originally published on abcnews.com.np.