हुम्ला । नेपाल–चीन सीमा क्षेत्रको नाम्खा गाउँपालिका–६ स्थित लाप्चा नाकाबाट सुरक्षाकर्मीको संयुक्त टोलीले ५१ लाख रुपैयाँभन्दा बढी मूल्यको अवैध चिनियाँ मदिरा तथा बियर बरामद गरेको छ।

व्यापार मेलाका क्रममा लाप्चा नाकाबाट भित्र्याइएको उक्त मदिरा बेवारिसे अवस्थामा फेला परेपछि सुरक्षाकर्मीले नियन्त्रणमा लिएका हुन्।

जिल्ला प्रहरी कार्यालय हुम्लाका प्रहरी नायब उपरीक्षक शंकर खड्काका अनुसार ५९४ कार्टुन चिनियाँ मदिरा बरामद गरिएको छ। प्रत्येक कार्टुनमा १२ बोतलका दरले जम्मा ७ हजार १२८ बोतल मदिरा रहेको उहाँले जानकारी दिनुभयो।

त्यस्तै, सुरक्षाकर्मीले १९४ कार्टुन चिनियाँ बियर समेत बरामद गरेका छन्। एउटा कार्टुनमा २४ बोतलका दरले जम्मा ४ हजार ६५६ बोतल बियर बरामद भएको प्रहरीले जनाएको छ।

बरामद गरिएको मदिरा तथा बियरको कुल मूल्य ५१ लाख ९३ हजार ६०० रुपैयाँ रहेको प्रहरी नायब उपरीक्षक खड्काले बताउनुभयो।

व्यापार मेलाको क्रममा लाप्चा नाकाबाट अवैध रूपमा चिनियाँ मदिरा भित्र्याइएको सूचना प्राप्त भएपछि सहायक प्रमुख जिल्ला अधिकारी चन्द्रवीर शाहीको नेतृत्वमा संयुक्त सुरक्षाकर्मीको टोली परिचालन गरिएको थियो। टोलीले सल्ली क्षेत्रमा बेवारिसे अवस्थामा राखिएको मदिरा तथा बियर फेला पारेको हो।

बरामद गरिएको मदिरा तथा बियर शुक्रबार बिहान जिल्ला प्रहरी कार्यालय हुम्लामा ल्याइएको प्रहरीले जनाएको छ। बरामद सामग्रीबारे आवश्यक कानुनी प्रक्रिया अघि बढाइने जनाइएको छ।

Originally published on abcnews.com.np.