काठमाडौं । अखिल नेपाल फुटबल संघ (एन्फा) निलम्बनमा रहे पनि नेपाली १५ वर्षमुनिका खेलाडीले अजरबैजानमा हुने फिफा यु–१५ विश्वकप एन्ड फेस्टिभलमा सहभागिता जनाउने भएका छन्।

फिफाले एन्फालाई निलम्बन गरे पनि प्रतियोगिताका लागि निलम्बनअघि नै नाम दर्ता भइसकेकाले नेपाली खेलाडीलाई प्रतियोगितामा सहभागी हुने अनुमति मिलेको एन्फाका प्रवक्ता सुरेश शाहले बताए।

शाहका अनुसार यो प्रतियोगिता निलम्बनमा पर्नुअघि नै दर्ता गरिएको थियो। फिफाको प्रतिबन्धमा रहेको रुसका खेलाडीसमेत प्रतियोगितामा सहभागी भइरहेकाले नेपालको सहभागितामा समस्या नभएको उनले बताए।

प्रतियोगिताका लागि एन्फाले देशभरबाट खेलाडी छनोट प्रक्रिया सुरु गरेको छ। ‘फुटबलले विश्वलाई जोड्छ, हरेक प्रतिभालाई एक अवसर’ भन्ने नारासहित छनोट कार्यक्रम सञ्चालन गरिने एन्फाले जनाएको छ।

एन्फाका अनुसार ४९ जिल्ला र सात प्रदेशमा छनोट कार्यक्रम सञ्चालन हुनेछ। ४९ जिल्लामा साउन ३१ देखि भदौ ९ गतेसम्म, सात प्रदेशमा भदौ १२ देखि १४ गतेसम्म छनोट हुनेछ। त्यसपछि काठमाडौंमा भदौ १८ देखि २१ गतेसम्म केन्द्रीय छनोट आयोजना हुनेछ।

निलम्बनमा रहेको एन्फाले प्रतियोगितामा सहभागिताका लागि आवश्यक बजेट जुटाउने विषय भने चुनौतीपूर्ण बनेको छ। प्रवक्ता शाहले प्रतियोगिताका लागि नेपाल सरकारबाट सहयोग प्राप्त हुने विश्वास व्यक्त गरे।

उनका अनुसार खेलकुदमन्त्री एन्फाको निलम्बन फुकुवाका लागि पहल गरिरहेका छन्। यस्तो अवस्थामा यु–१५ विश्वकप फेस्टिभलमा नेपालको सहभागिताले युवा खेलाडीमा आशा जगाएको उनले बताए।

“यो प्रतियोगिताले खेलाडीमा आशा जगाएको छ। सहभागिताका लागि सरकारसँग सहयोग माग्छौँ,” शाहले भने।

एन्फा निलम्बनमा रहेका बेला नेपाली युवा खेलाडीले अन्तर्राष्ट्रिय प्रतियोगितामा प्रतिस्पर्धा गर्ने अवसर पाउनुलाई नेपाली फुटबलका लागि महत्वपूर्ण अवसरका रूपमा हेरिएको छ।

Originally published on abcnews.com.np.