काठमाडौँ । पूर्वराष्ट्रपति विद्यादेवी भण्डारीले युवाहरूलाई अध्ययन, संवाद र बहसका माध्यमबाट तथ्य तथा तर्कमा आधारित राजनीतिक धारणा निर्माण गर्न आग्रह गरेकी छन्। मदन भण्डारी आइडोलोजी स्टुडेन्ट फोरमले आइतबार आयोजना गरेको कार्यक्रममा बोल्दै उनले सामाजिक सञ्जालबाट प्राप्त सूचनालाई विवेकपूर्ण ढङ्गले विश्लेषण गरेर मात्रै राजनीतिक दृष्टिकोण बनाउनुपर्नेमा जोड दिइन्।

पूर्वराष्ट्रपति भण्डारीले आफूभन्दा फरक विचार राख्ने व्यक्तिको विचारलाई सम्मान गर्न पनि युवाहरूलाई आग्रह गरिन्। उनका अनुसार लोकतन्त्रको वास्तविक शक्ति आफूले राखेको विचारलाई मात्र स्थापित गर्नुमा नभई फरक मतलाई सुन्ने, त्यसको सम्मान गर्ने र तथ्यका आधारमा आफ्नो धारणा परिमार्जन गर्न सक्ने राजनीतिक संस्कृतिमा निहित हुन्छ।

उनले अहिलेको पुस्ता सूचना तथा प्रविधिको पहुँचका कारण विगतका पुस्ताभन्दा धेरै सूचना सम्पन्न भए पनि धेरै सूचना हुनु र सही ज्ञान हासिल गर्नु फरक विषय भएको बताइन्।

“आजको पुस्ता सामाजिक सञ्जाल, सूचना प्रविधि र विश्वव्यापी सम्पर्कका कारण विगतका पुस्ताभन्दा धेरै सूचना सम्पन्न छ। तर सूचना धेरै हुनु र सही ज्ञान हुनु एउटै कुरा होइन,” उनले भनिन्, “त्यसैले सूचनालाई तथ्यसँग, भावनालाई विवेकसँग र आलोचनालाई रचनात्मकतासँग जोड्न सक्ने क्षमता आजको पुस्ताका लागि अत्यन्तै महत्वपूर्ण छ।”

भण्डारीले युवाको राजनीतिक सहभागिता निर्वाचनका बेला मत माग्ने वा मतदान गर्ने कार्यमा मात्र सीमित हुन नहुने बताइन्। समाजको वास्तविक अवस्था बुझ्ने, जनताको आवाज सुन्ने, सार्वजनिक नीतिमाथि बहस गर्ने र नीति निर्माण प्रक्रियामा सक्रिय भूमिका निर्वाह गर्ने गरी युवाको सहभागिता विस्तार हुनुपर्ने उनको भनाइ थियो।

उनले बदलिँदो राजनीतिक तथा सामाजिक परिवेशअनुसार मदन भण्डारीका विचारलाई नयाँ पुस्ताले अध्ययन र व्याख्या गर्नुपर्ने बताइन्। कुनै विचारलाई केवल विगतको राजनीतिक दस्तावेजका रूपमा हेर्नुभन्दा त्यसका मूल मान्यता र आजको बदलिँदो समाजबीचको सम्बन्ध पहिल्याउनुपर्ने उनको धारणा थियो।

लोकतन्त्रलाई थप प्रभावकारी बनाउने, राज्यका संस्थालाई जवाफदेही बनाउने तथा राजनीतिमा युवाको अर्थपूर्ण सहभागिता बढाउने विषयमा गम्भीर बहस आवश्यक रहेको उनले बताइन्। त्यसैगरी शिक्षा, रोजगारी, उद्यमशीलता र युवाका अवसर विस्तारलाई राजनीतिक प्राथमिकताको विषय बनाउनुपर्नेमा उनले जोड दिइन्।

देशमा परिवर्तनको अपेक्षा उच्च रहेको र युवापुस्तासँग नयाँ सोच, ऊर्जा तथा प्रविधिको ज्ञान रहेको उल्लेख गर्दै भण्डारीले त्यसलाई सकारात्मक सामाजिक तथा राजनीतिक परिवर्तनमा रूपान्तरण गर्न आग्रह गरिन्।

उनले युवाहरू लोकतन्त्रप्रति प्रतिबद्ध, सामाजिक न्यायप्रति संवेदनशील, राष्ट्रिय हितप्रति सचेत, अध्ययनशील र जिम्मेवार नागरिक बन्नुपर्ने बताइन्। नयाँ पुस्ताले नै मुलुकको राजनीतिक संस्कार, लोकतान्त्रिक अभ्यास र भविष्यको दिशा निर्धारण गर्ने भएकाले युवाको भूमिका निर्णायक हुने उनको भनाइ थियो।

Originally published on abcnews.com.np.