काठमाडौं । प्रधानमन्त्री वालेन्द्र शाह ‘बालेन’ र मन्त्रीहरूबीच चालु आर्थिक वर्षका लागि कार्यसम्पादन सम्झौता भएको छ। सम्झौतामार्फत प्रत्येक मन्त्रालयले वर्षभरि सम्पन्न गर्ने प्रमुख काम, अपेक्षित उपलब्धि र प्राथमिकताका कार्यक्रमलाई लक्ष्यका रूपमा तय गरिएको छ।

प्रधानमन्त्री तथा मन्त्रीबीच भएको सम्झौतामा सम्बन्धित मन्त्रालयका मुख्य कार्यक्रम, कार्यान्वयनको लक्ष्य र अपेक्षित परिणाम समेटिएका छन्। मन्त्रीहरूले आफ्नो कार्यक्षेत्रभित्रका प्राथमिकता प्राप्त कार्यक्रम तोकिएको समयभित्र कार्यान्वयन गर्ने प्रतिबद्धता जनाएका छन्।

सचिवको प्रस्तावका आधारमा सम्झौता

कार्यसम्पादन सम्झौताको तयारी मुख्यसचिवको अध्यक्षतामा बसेको सचिवहरूको बैठकबाट सुरु भएको थियो। बैठकले चालु आर्थिक वर्षमा मन्त्रालयगत कामलाई लक्ष्यमा आधारित बनाउन मन्त्रीहरूसँग कार्यसम्पादन सम्झौता गर्ने निर्णय गरेको थियो।

सोहीअनुसार सम्बन्धित मन्त्रीसँगको परामर्शपछि मन्त्रालयका सचिवहरूले कार्यसम्पादन सम्झौताको मस्यौदा तयार गरेका थिए। मस्यौदा प्रधानमन्त्रीसमक्ष पेस भएपछि त्यसलाई अन्तिम रूप दिइएको हो।

प्रधानमन्त्री शाहले बुधबार सम्बन्धित मन्त्रीहरूसँग तयार गरिएका सम्झौतामा हस्ताक्षर गरी आदानप्रदान गरेका छन्।

लक्ष्यअनुसार काम गर्ने प्रतिबद्धता

कार्यसम्पादन सम्झौताले सरकारका प्राथमिकता र मन्त्रालयका कामलाई स्पष्ट लक्ष्यमा बाँध्ने अपेक्षा गरिएको छ।

सम्झौताअनुसार मन्त्रीहरूले आफ्नो मन्त्रालयअन्तर्गतका प्राथमिकताका कार्यक्रमलाई प्रभावकारी रूपमा अघि बढाउनुपर्नेछ। यसबाट सरकारका घोषणा तथा नीतिगत निर्णय कार्यान्वयनमा गति आउने र मन्त्रालयहरूको कामलाई परिणामसँग जोड्न सहयोग पुग्ने सरकारको अपेक्षा छ।

प्रधानमन्त्री कार्यालयले गर्ने अनुगमन

प्रधानमन्त्रीको सचिवालयले प्रेस विज्ञप्तिमार्फत कार्यसम्पादन सम्झौता सम्पन्न भएको जानकारी दिएको छ।

सम्झौता कार्यान्वयनसँगै अब मन्त्रीहरूले निर्धारित कार्ययोजनाअनुसार काम अघि बढाउनेछन्। मन्त्रालयहरूले तय गरेका लक्ष्य र उपलब्धिको अवस्थाबारे प्रधानमन्त्री तथा प्रधानमन्त्री कार्यालयबाट अनुगमन गरिने जनाइएको छ।

कार्यसम्पादन सम्झौतामार्फत ‘काम गर्ने प्रतिबद्धता’लाई लिखित लक्ष्यमा रूपान्तरण गर्दै त्यसको परिणामका आधारमा सरकारका मन्त्रीहरूको कार्यसम्पादन मूल्यांकन गर्ने आधार तयार भएको सरकारको बुझाइ छ।

यसले मन्त्रालयगत जिम्मेवारी, समयसीमा र अपेक्षित उपलब्धिलाई स्पष्ट पार्दै सरकारको समग्र कार्यसम्पादनलाई थप परिणाममुखी बनाउने अपेक्षा गरिएको छ।

Originally published on abcnews.com.np.