चितवन । राष्ट्रिय पन्छी रोग अन्वेषण प्रयोगशाला, चितवनले पछिल्लो एक वर्षमा करिब ७ हजार कुखुराको पोस्टमार्टम गरेको छ। चितवनसहित देशका १६ जिल्लाबाट किसानले ल्याएका कुखुराको पोस्टमार्टम तथा विभिन्न प्रयोगशाला परीक्षणमार्फत रोग पहिचान गरिएको हो।

प्रयोगशाला प्रमुख डा. विजयकुमार श्रेष्ठका अनुसार परीक्षण गरिएका कुखुरामा इकोलाई, गम्बारो, सीआरडी, धुसीजन्य रोग, सिआरडी, साल्मोनेलोसिस, एभियन इन्फ्लुएन्जा, कुखुराको हैजा, आईबी र रानीखेत लगायतका रोग भेटिएका छन्।

एक हजार ५०० नमुना परीक्षण गर्दा २२ प्रतिशतमा इकोलाई, १३ प्रतिशतमा गम्बारो र ९ प्रतिशतमा सीआरडी संक्रमण देखिएको डा. श्रेष्ठले बताए। यस्तै, धुसीजन्य रोग ९ प्रतिशत, सिसिआरडी ४ प्रतिशत र साल्मोनेलोसिस ३ दशमलव ५ प्रतिशतमा देखिएको छ।

द्रुत परीक्षणका क्रममा २७८ नमुनामध्ये ४७ वटामा एभियन इन्फ्लुएन्जा पुष्टि भएको छ। त्यसैगरी, १७६ वटा गम्बारो परीक्षण गर्दा १०९ वटा, ९५ वटा रानीखेत परीक्षण गर्दा ७ वटा र ४६ वटा आईबी परीक्षण गर्दा २ वटा नमुनामा संक्रमण देखिएको प्रयोगशालाले जनाएको छ।

पीएटी विधिबाट परीक्षण गरिएका ३६९ नमुनामध्ये १२ वटामा साल्मोनेला तथा ३६० नमुनामध्ये १६ वटामा माइकोप्लाज्मा संक्रमण भेटिएको छ। इलाइजा परीक्षणमा १८४ नमुनामध्ये ३८ वटामा माइकोप्लाज्मा र सोही संख्याका नमुनामध्ये ९२ वटामा चिकेन इन्फेक्सस एनेमिया भाइरस (सीआईएभी) संक्रमण पुष्टि भएको छ।

त्यस्तै, ९ सय कुखुराको नमुना कल्चर परीक्षण गर्दा ७८९ वटामा संक्रमण देखिएको डा. श्रेष्ठले जानकारी दिए।

प्रयोगशालाले संक्रमण पुष्टि भएका कुखुरामा प्रयोग गर्नुपर्ने एन्टिबायोटिकबारे किसान तथा सेवाग्राहीलाई आवश्यक जानकारी दिँदै आएको जनाएको छ।

जैविक सुरक्षा अपनाउन सुझाव

कुखुराजन्य रोगको संक्रमण नियन्त्रणका लागि किसानले जैविक सुरक्षा (बायोसेक्युरिटी) मा विशेष ध्यान दिनुपर्ने चिकित्सकहरूको सुझाव छ। कुखुराको खोरमा सरसफाइ, बाहिरी व्यक्तिको आवतजावत नियन्त्रण, संक्रमित कुखुरा अलग राख्ने तथा आवश्यक स्वास्थ्य परीक्षण नगरी नयाँ कुखुरा नथप्ने जस्ता उपायले रोगको जोखिम कम गर्न सकिने उनीहरूको भनाइ छ।

प्रयोगशालाले कुखुरामा हुने रोग पहिचानका लागि पोस्टमार्टमसँगै कल्चर, पीएटी, इलाइजा तथा द्रुत परीक्षण लगायतका विधि प्रयोग गर्दै आएको छ।

Originally published on abcnews.com.np.