काठमाडौँ । नेपालीको पहिचान, गौरव र शानका रूपमा स्थापित परम्परागत खुकुरी बनाउने सीप तथा व्यवसायको संरक्षणमा वर्ल्डलिंक कम्युनिकेसन्स लिमिटेडले सहयोग गरेको छ।

सल्यानको खलङ्गास्थित विश्वकर्मा टोलमा पुस्तौँदेखि खुकुरी निर्माण गर्दै आएका राजु विक र पार्वती विकलाई वर्ल्डलिंकले संस्थागत सामाजिक उत्तरदायित्व (सीएसआर) अन्तर्गत सुरक्षित टहरा निर्माण गरी हस्तान्तरण गरेको हो।

परम्परागत सीप र व्यवसायलाई निरन्तरता दिँदै स्थानीयस्तरमा रोजगारी तथा आयआर्जनका अवसर कायम राख्ने उद्देश्यले निर्माण गरिएको टहराले विक दम्पतीलाई खुकुरी तथा अन्य फलामजन्य सामग्री निर्माणका लागि सुरक्षित र व्यवस्थित कार्यस्थल उपलब्ध गराएको छ।

नेपाली खुकुरी केवल हतियार नभई नेपालीको मौलिक पहिचान, साहस, गौरव र शानसँग जोडिएको ऐतिहासिक सम्पदा हो। पुस्तौँदेखि हस्तान्तरण हुँदै आएको यो परम्परागत सीप सुरक्षित कार्यस्थल, आवश्यक पूर्वाधार र बजारको अभावका कारण संकटमा पर्दै गएको अवस्थामा वर्ल्डलिंकको सहयोगले व्यवसायलाई निरन्तरता दिन थप हौसला मिलेको राजु विकले बताए।

खुकुरी निर्माणमा प्रयोग हुँदै आएको परम्परागत ज्ञान, सीप र प्रविधिलाई नयाँ पुस्तामा हस्तान्तरण गर्दै स्थानीय मौलिकता जोगाउनुपर्नेमा स्थानीयवासीले जोड दिएका छन्। यस्ता पहलले सीप संरक्षण, परम्पराको निरन्तरता र स्थानीय व्यवसायलाई आत्मनिर्भर बनाउने प्रयासमा समेत योगदान पुग्ने विश्वास गरिएको छ।

वर्ल्डलिंकले समुदायको आवश्यकता पहिचान गरी सामाजिक तथा आर्थिक रूपमा पछाडि परेका समुदायको सीप संरक्षण, व्यवसाय प्रवर्द्धन र दिगो जीविकोपार्जनमा सहयोग पुर्‍याउने उद्देश्यले विभिन्न कार्यक्रम सञ्चालन गर्दै आएको जनाएको छ।

टहरा हस्तान्तरण कार्यक्रममा स्थानीय प्रतिनिधि, समुदायका सदस्य तथा वर्ल्डलिंकका प्रतिनिधिको सहभागिता थियो। कार्यक्रममा परम्परागत सीप तथा व्यवसायको संरक्षणका लागि स्थानीय समुदाय, सरकार र निजी क्षेत्रबीच सहकार्य आवश्यक रहेकोमा जोड दिइएको थियो।

नेपालीको पहिचान र गौरवसँग जोडिएको खुकुरी बनाउने पुस्तौँ पुरानो सीपलाई संरक्षण गर्दै स्थानीय व्यवसायलाई नयाँ पुस्तासम्म पुर्‍याउने प्रयासमा वर्ल्डलिंकको यो पहल अर्थपूर्ण कदम बनेको छ।

Originally published on abcnews.com.np.