हेटौँडा । बागमती प्रदेशको मुख्यमन्त्रीमा नेकपा एमालेका किरण थापा मगर नियुक्त भएका छन्। नेकपा र राष्ट्रिय प्रजातन्त्र पार्टी (राप्रपा)को समर्थनमा प्रदेश प्रमुखले थापालाई मुख्यमन्त्री नियुक्त गरेका हुन्।

थापाको नेतृत्वमा सरकार गठनमा राप्रपाको सहभागितालाई लिएर पार्टीभित्र विवाद उत्पन्न भएको छ। पार्टीको केन्द्रीय निर्देशनविपरीत सरकार गठन प्रक्रियामा सहभागी भएको भन्दै राप्रपाले संसदीय दलका नेता उद्धव थापामाथि कारबाही गरेको हो।

राप्रपा कार्यसम्पादन समितिको आज बसेको बैठकले पार्टी निर्णयविपरीत कदम चालेको ठहर गर्दै उद्धव थापालाई संसदीय दलको नेताबाट पदमुक्त गर्ने निर्णय गरेको छ। साथै, उनलाई पार्टीको साधारण सदस्यबाट समेत निलम्बन गर्ने निर्णय गरिएको छ।

केन्द्रको निर्देशनविपरीत राप्रपाबाट किरण थापा नेतृत्वको सरकारमा तीन जना मन्त्री सहभागी हुने भएका छन्। नवनियुक्त मन्त्रीहरूको आजै शपथग्रहणको तयारी गरिएको छ।

राप्रपाको निर्णय र प्रदेश सरकारमा पार्टीको सहभागिताले बागमती प्रदेशको नयाँ सत्ता समीकरणसँगै पार्टीभित्रको विवादलाई समेत थप सतहमा ल्याएको छ।

Originally published on abcnews.com.np.