बाजुरा, भदौ ५ गते । बाजुराको गौमुल गाउँपालिका–३ कटी गाउँमा पहिरोले दुई घर बगाएको छ। बिहीबार दिउँसो अविरल वर्षासँगै आएको पहिरोले स्थानीय पूर्णिमल बोहरा र बुदी बोहराको घर बगाएको जिल्ला प्रहरी कार्यालय बाजुराले जनाएको छ।

पहिरो दिउँसो आएको हुँदा मानवीय क्षति भने नभएको जिल्ला प्रहरी कार्यालय बाजुराका सूचना अधिकारी नरेशबहादुर शाहीले जानकारी दिनुभयो। उहाँका अनुसार घरमा रहेका अन्नपात, भाँडाकुँडा, लत्ताकपडालगायत सम्पूर्ण सामान नष्ट भएका छन्।

“अहिले उहाँहरूको परिवारको बिचल्ली भएको छ। त्रिपालको भरमा खुला आकाशमुनि बस्नुपर्ने अवस्था छ,” शाहीले भन्नुभयो।

पहिरोका कारण थप दुई घरधुरीसमेत जोखिममा परेका छन्। आसपासका १४ घरपरिवार पनि पहिरोको जोखिममा परेपछि उनीहरूलाई सुरक्षित स्थानमा सारिएको प्रहरीले जनाएको छ।

Originally published on abcnews.com.np.