भद्रपुर, झापा । वर्षायाम सुरु भएसँगै झापा जिल्लामा जापानिज इन्सेफ्लाइटिस (जेई) संक्रमणको जोखिम बढ्दै गएको छ। मेचीनगर नगरपालिका–८ की ६४ वर्षीया एक महिलाको जेई संक्रमणबाट मृत्यु भएपछि यस वर्ष जिल्लामा यस रोगबाट ज्यान गुमाउनेको संख्या छ पुगेको छ।

जिल्ला स्वास्थ्य कार्यालयका जनस्वास्थ्य निरीक्षक विश्वनाथ श्रेष्ठका अनुसार ती महिलाको गत साता मृत्यु भएको हो। यससँगै जिल्लामा हालसम्म जापानिज इन्सेफ्लाइटिसबाट संक्रमित हुनेको संख्या ११ पुगेको छ।

हालसम्म संक्रमणबाट मृत्यु हुनेमध्ये चार जना महिला र दुई जना पुरुष रहेका छन्।

परीक्षण र अनुगमन तीव्र

जिल्ला स्वास्थ्य कार्यालयले सम्भावित संक्रमण पहिचान गर्न जेई परीक्षणलाई तीव्रता दिएको जनाएको छ। साथै, संक्रमणको अवस्था तथा जोखिमयुक्त क्षेत्रको निगरानी गर्न स्वास्थ्यकर्मी टोलीलाई जिल्लाका विभिन्न स्थानमा निरन्तर परिचालन गरिएको जनस्वास्थ्य निरीक्षक श्रेष्ठले जानकारी दिए।

वर्षायामसँगै लामखुट्टेको प्रकोप बढ्ने भएकाले स्वास्थ्य कार्यालयले संक्रमण नियन्त्रण तथा सम्भावित थप जोखिम न्यूनीकरणका लागि अनुगमन र परीक्षणलाई प्राथमिकतामा राखेको जनाएको छ।

Originally published on abcnews.com.np.