काठमाडौं । ऊर्जा, जलस्रोत तथा सिँचाइमन्त्री विराजभक्त श्रेष्ठ विद्युत् तथा सिँचाइ पूर्वाधारको स्थलगत निरीक्षण गर्न आज कोशी प्रदेशको भ्रमणमा निस्कँदै छन्। मन्त्री श्रेष्ठसहितको टोली दिउँसो १ बजे प्रदेश राजधानी विराटनगर प्रस्थान गर्ने कार्यक्रम छ।

भ्रमणका क्रममा टोलीले कोशी प्रदेशमा देखिएका विद्युत् आपूर्ति समस्या, प्रसारण लाइन तथा अन्य विद्युत् पूर्वाधारको अवस्था निरीक्षण गर्नेछ। यस्तै, सिँचाइको पहुँच, नहरको अवस्था तथा सञ्चालनमा देखिएका समस्याबारे पनि स्थलगत अध्ययन गरिने मन्त्रीको सचिवालयले जनाएको छ।

तीनदिने भ्रमण

मन्त्री श्रेष्ठको तीनदिने भ्रमणका क्रममा इनरुवास्थित ४०० केभी भोक्राहा सबस्टेसन र केरौना सबस्टेसनको निरीक्षण गर्ने कार्यक्रम छ।

त्यस्तै, बराहक्षेत्र–चतरा नहरको स्थलगत निरीक्षणका साथै नेपालको पुरानो सिँचाइ प्रणालीमध्ये एक चन्द्र नहरको समेत अवलोकन गरिनेछ।

स्थलगत निरीक्षणबाट विद्युत् तथा सिँचाइ पूर्वाधारको वास्तविक अवस्था पहिचान गरी आवश्यक सुधारका लागि रणनीति बनाउन सहयोग पुग्ने मन्त्रालयले जनाएको छ।

निरीक्षण टोलीमा उच्च अधिकारी

मन्त्री श्रेष्ठसँग मन्त्रालयका सचिव सरिता दवाडी, सहसचिव मोहनकुमार शाक्य, निजी सचिव सुदर्शन श्रेष्ठ तथा सचिवालय सदस्य देवेश बेल्बासेलगायत सहभागी हुनेछन्।

यस्तै, जलस्रोत तथा सिँचाइ विभागका महानिर्देशक डा. महेश्वर श्रेष्ठ, उपमहानिर्देशक दिनेश भट्ट र नेपाल विद्युत् प्राधिकरणका कामु निर्देशक दीर्घायुकुमार श्रेष्ठ पनि टोलीमा रहनेछन्।

मन्त्री श्रेष्ठ यसअघि सुदूरपश्चिम, कर्णाली र लुम्बिनी प्रदेश पुगेर त्यहाँका विद्युत् तथा सिँचाइसम्बन्धी समस्या र पूर्वाधारको स्थलगत अवस्था बुझेका थिए।

Originally published on abcnews.com.np.