काठमाडौँ । स्वास्थ्य तथा खाद्य स्वच्छता मन्त्रालयले स्थानीय तहअन्तर्गतका स्वास्थ्य संस्थामा निःशुल्क वितरण गरिने औषधि तथा स्वास्थ्य सामग्रीको नियमित उपलब्धता सुनिश्चित गर्न सबै स्थानीय तहलाई परिपत्र गरेको छ।

संघीय मामिला तथा सामान्य प्रशासन मन्त्रालयमार्फत पठाइएको परिपत्रमा आधारभूत स्वास्थ्य सेवाका लागि आवश्यक औषधि तथा स्वास्थ्य सामग्रीको सूचीसमेत समावेश गरिएको छ। मन्त्रालयले वर्षभरि स्वास्थ्य संस्थामा औषधिको अभाव हुन नदिन स्थानीय तहलाई आफ्नो जिम्मेवारीअनुसार आवश्यक व्यवस्थापन गर्न आग्रह गरेको हो।

परिपत्रअनुसार स्थानीय तहले मातहतका स्वास्थ्य संस्थामा आवश्यक औषधिको खरिद, भण्डारण र वितरणलाई व्यवस्थित गर्नुपर्नेछ। औषधिसँगै आधारभूत स्वास्थ्य सेवा प्रदान गर्न आवश्यक मेडिकल सामग्रीको व्यवस्थापनमा समेत ध्यान दिन मन्त्रालयले आग्रह गरेको छ।

मन्त्रालयले निःशुल्क औषधि वितरणको व्यवस्था प्रभावकारी बनाउन स्थानीय तहले नियमित रूपमा औषधिको आवश्यकता पहिचान गरी पर्याप्त मौज्दात कायम राख्नुपर्ने जनाएको छ। यसबाट स्थानीय तहका स्वास्थ्य संस्थामा सेवाग्राहीले वर्षभरि आवश्यक आधारभूत औषधि सहज रूपमा पाउने अपेक्षा गरिएको छ।

Originally published on abcnews.com.np.