बाग्मती प्रदेशमा राप्रपा संसदीय दलका नेता उद्धव थापाले पार्टीको नीतिविपरीत एमाले नेतृत्वको सरकारलाई समर्थन गरेपछि उनीमाथि कारबाही गर्ने विषयमा छलफल गर्न बैठक बोलाइएको थियो। यसअघि पार्टीको अनुशासन समितिले पनि उद्धव थापालाई कारबाही गर्न सिफारिस गरिसकेको थियो।

बैठकमा अध्यक्ष राजेन्द्र लिङदेनले उद्धव थापामाथि कारबाहीको प्रस्ताव अघि सारेपछि प्रेम श्रेष्ठले त्यसको समर्थन गरेका थिए। पार्टीको विधि र पद्धति उल्लंघन गर्नेलाई कारबाही गर्नुपर्ने धारणा राख्ने क्रममा पूर्वअध्यक्ष कमल थापा आक्रोशित बनेको स्रोतको दाबी छ।

स्रोतका अनुसार कमल थापाले श्रेष्ठलाई लक्षित गर्दै उनको अमेरिकी नागरिकताबारे प्रश्न उठाएका थिए। त्यसपछि श्रेष्ठले पनि प्रतिवाद गर्दै विगतमा आफूलाई पार्टीको जिम्मेवारी दिइएको विषय उठाएपछि विवाद चर्किएको थियो।

दुवैबीचको भनाभन बढ्दै गएपछि बैठकमा सहभागी नेताहरू आ–आफ्नो ठाउँबाट उठेका थिए। स्थिति हात हालाहालको अवस्थामा पुगेपछि अध्यक्ष लिङदेनसहित अन्य नेताहरूले दुवैलाई छुट्याउने प्रयास गरेका थिए। केही समयपछि मात्रै बैठकको वातावरण सामान्य बनेको बताइएको छ।

त्यसपछि कमल थापाले बैठकको निर्णयमा आफ्नो ‘नोट अफ डिसेन्ट’ राख्न आग्रह गर्दै बैठकबाट बाहिरिएको र बाहिर सञ्चारकर्मीसँग उद्धव थापामाथि कारबाहीको निर्णय भएको जानकारी गराएको स्रोतको भनाइ छ।

यद्यपि, बैठकमा लिखित रूपमा कसैले पनि नोट अफ डिसेन्ट नदिएको बताइएको छ। उद्धव थापालाई कारबाही गर्न नहुने पक्षमा डा. प्रकाशचन्द्र लोहनी, विक्रम पाण्डे, विक्रम थापा, अर्जुन राई र डा. गीताभक्त जोशीलगायत नेताहरूले धारणा राखेको स्रोतले जनाएको छ।

पूर्वअध्यक्ष कमल थापाले सामाजिक सञ्जालमार्फत बैठकमा असहज र अप्रिय परिस्थिति सिर्जना भएको भन्दै आफूलाई दुःख लागेको बताएका छन्।

उनले पार्टीभित्र गम्भीर संवादहीनता बढ्दै गएको दाबी गर्दै कारबाही र निष्कासन मात्र समस्याको समाधान नभएको बताएका छन्। पार्टीभित्र ‘म नै पार्टी हुँ र मैले भनेकै हुनुपर्छ’ भन्ने अधिनायकवादी सोच हाबी हुँदै गएको भन्दै उनले सद्भाव, एकता, विधि र पद्धतिका आधारमा पार्टी सञ्चालन गर्नुपर्ने धारणा राखेका छन्।

बाग्मती प्रदेशमा पार्टी नीतिविपरीत एमाले नेतृत्वको सरकारलाई समर्थन गरेको विषयबाट सुरु भएको विवादले राप्रपाभित्रको आन्तरिक मतभेदलाई थप सतहमा ल्याएको छ। पछिल्लो घटनाले पार्टी नेतृत्व र फरक धारमा रहेका नेताहरूबीचको दूरी थप बढ्न सक्ने देखिएको छ।