काठमाडौं । राष्ट्रियसभा सदस्य मोहम्मद खालिदले बाराकी तीन वर्षीया गरिमा चौधरीको हत्या घटनाप्रति दुःख व्यक्त गर्दै दोषीलाई कडा कानुनी कारबाही गर्न सरकारसँग माग गरेका छन्।

शुक्रबार राष्ट्रियसभा बैठकमा बोल्दै सांसद खालिदले यस्ता जघन्य अपराध दोहोरिन नदिन कानुन पर्याप्त नभए थप कडा कानुनी व्यवस्था गर्नुपर्ने बताए। उनले दोषीलाई हदैसम्मको सजाय दिएर अपराधीलाई निरुत्साहित गर्नुपर्नेमा जोड दिए।

त्यस्तै, खालिदले सिरहाको गोलबजारमा भएको व्यापारिक कम्प्लेक्स आगजनी घटनाबारे पनि सरकारको ध्यानाकर्षण गराए। घटनाले स्थानीय व्यवसायी तथा लगानीकर्तामा निराशा बढेको भन्दै उनले पीडित व्यवसायीलाई उचित क्षतिपूर्ति उपलब्ध गराउन सरकारसँग माग गरे।

उनले लगानीको सुरक्षा सुनिश्चित नभए नयाँ क्षेत्रमा लगानी आकर्षित गर्न कठिन हुने भन्दै गोलबजारका व्यवसायीमा विश्वास र आशा जगाउन सरकारले तत्काल आवश्यक कदम चाल्नुपर्ने बताए।

Originally published on abcnews.com.np.