कास्की । पोखरा महानगरपालिका–१८ लामागाउँमा मोटरसाइकल दुर्घटना हुँदा एक महिलाको मृत्यु भएको छ भने एक जना गम्भीर घाइते भएका छन्।

आइतबार तीव्र गतिमा रहेको मोटरसाइकल अनियन्त्रित भएर सडक छेउको विद्युत् पोलमा ठोक्किएपछि दुर्घटना भएको जिल्ला प्रहरी कार्यालय कास्कीले जनाएको छ। दुर्घटनापछि मोटरसाइकलमा पछाडि सवार महिला सडकमा लडेकी थिइन्।

प्रहरीका अनुसार ग.२० प ६०९४ नम्बरको मोटरसाइकलबाट लडेकी २९ वर्षीया रुपा बिकलाई पोखराबाट साराङकोटतर्फ जाँदै गरेको ग.१ ख ४३३५ नम्बरको बसले किचेको थियो। गम्भीर घाइते भएकी बिकलाई तत्काल मणिपाल शिक्षण अस्पताल लगिएकोमा चिकित्सकले मृत घोषणा गरेका थिए।

दुर्घटनामा मोटरसाइकल चालक ४३ वर्षीय रामचन्द्र बिक गम्भीर घाइते भएका छन्। उनको टाउको र दायाँ कानमा चोट लागेको छ। उनको मणिपाल शिक्षण अस्पतालमा उपचार भइरहेको प्रहरीले जनाएको छ।

दुर्घटनापछि प्रहरीले बस चालक २४ वर्षीय अभिषेक परियारलाई नियन्त्रणमा लिएको छ। अन्नपूर्ण गाउँपालिका–१ नौडाँडाका परियारलाई नियन्त्रणमा लिएर घटनाबारे थप अनुसन्धान भइरहेको प्रहरीले जनाएको छ।

Originally published on abcnews.com.np.