रुपन्देही । लुम्बिनी प्रदेश सरकारमा सत्तारुढ नेकपाले आफ्नो तर्फबाट तीन जना मन्त्रीको नाम र मन्त्रालयको जिम्मेवारी टुंगो लगाएको छ।

स्रोतका अनुसार देउखुरीका पूर्वमन्त्री इन्द्रजित चौधरी, रोल्पाका पूर्वमन्त्री दीपेन्द्र पुन सिल र बर्दियाकी कृष्णाकुश्मा थारुलाई मन्त्री बनाउने निर्णय भएको हो। इन्द्रजित चौधरीलाई आर्थिक मामिला, दीपेन्द्र पुनलाई स्वास्थ्य तथा कृष्णाकुश्मा थारुलाई वन तथा पर्यटन मन्त्रालयको जिम्मेवारी दिने सहमति भएको जनाइएको छ।

नेकपाले मुख्यमन्त्री चेतनारायण आचार्यसँग यसअघि अर्थ, सहरी विकास तथा कृषि वा वन–पर्यटनमध्ये एक मन्त्रालय पाउने मौखिक सहमति भएको दाबी गरेको थियो। तर जसपा नेपालका सन्तोष पाण्डेयले सहरी विकास मन्त्रालयमा दाबी गरेपछि मन्त्रालय बाँडफाँटमा ढिलाइ भएको नेकपाका एक नेताले बताए।

यसअघि शुक्रबार नै मन्त्रीहरूको शपथको तयारी गरिएको भए पनि नाम टुंगो लाग्न नसकेपछि कार्यक्रम रोकिएको थियो। मुख्यमन्त्री कार्यालयले प्रदेश प्रमुखको कार्यालयमा शपथका लागि पत्र पठाइसकेको भए पनि समय निर्धारण भइसकेको छैन। सम्भवतः सोमबार नयाँ मन्त्रीहरूको शपथ हुने बताइएको छ।

मन्त्रालयमा हेरफेर

नेकपाका तीन मन्त्री थपिएपछि एमाले र जसपाका केही मन्त्रीको जिम्मेवारीसमेत हेरफेर गरिएको छ। डिल्लीराज भुसाललाई सहरी विकास मन्त्रालयबाट हटाएर मुख्यमन्त्री कार्यालय हेर्ने गरी बिनाविभागीय मन्त्री बनाइएको छ। रामजीप्रसाद घिमिरेलाई सामाजिक विकास मन्त्रालयको जिम्मेवारी दिइएको छ भने रत्नबहादुर खत्रीलाई भौतिक पूर्वाधार विकास मन्त्रालयमै कायम राखिएको छ।

तुलसीप्रसाद चौधरीलाई पर्यटन मन्त्रालयको जिम्मेवारी दिइएको छ। जसपा नेपालका सन्तोष पाण्डेयलाई सहरी विकास, ऊर्जा, सिँचाइ तथा खानेपानी र भण्डारीलाल अहिरलाई आन्तरिक मामिला, कानुन, उद्योग तथा यातायातको जिम्मेवारी यथावत् राखिएको छ।

१० सदस्यीय बन्दै मन्त्रिपरिषद्

नयाँ मन्त्री थपिएसँगै लुम्बिनी प्रदेशको मन्त्रिपरिषद् १० सदस्यीय पुग्नेछ। सरकारले नीति तथा कार्यक्रममा आठ वटा मन्त्रालय कायम गर्ने निर्णय गरे पनि सत्ता साझेदारबीच भागबन्डा मिलाउन मन्त्रालय थपिएको भन्दै प्रमुख प्रतिपक्षी दलका नेता डिल्लीबहादुर चौधरीले प्रदेशसभामा प्रश्न उठाएका थिए।

लुम्बिनी प्रदेशसभामा एमालेका २९, नेकपाका १३, जसपा नेपालका ५ र जनमोर्चाका १ सांसद छन्। मुख्यमन्त्री आचार्यले भदौ १ गते प्रदेशसभाबाट विश्वासको मत लिएका थिए। अब उनले सोमबारसम्म मन्त्रिपरिषद्लाई पूर्णता दिने तयारी गरेका छन्।

Originally published on abcnews.com.np.