स्याङ्जा । अर्जुन चौपारी गाउँपालिका–१ बजारमा पालिकामै पहिलोपटक दुग्ध चिस्यान केन्द्र सञ्चालनमा ल्याइएको छ। भैंसीपालक किसानलाई आर्थिक रूपमा सबल बनाउने उद्देश्यले जन विकास साना किसान कृषि सहकारी संस्था लिमिटेडको पहलमा चिस्यान केन्द्र सञ्चालनमा ल्याइएको हो।

गण्डकी प्रदेश कृषि तथा भूमि व्यवस्था मन्त्रालयअन्तर्गत पशुपन्छी तथा मत्स्य विकास निर्देशनालय, प्रशिक्षण केन्द्र पोखराको ९० प्रतिशत अनुदान सहयोग र सहकारीको १० प्रतिशत साझेदारीमा केन्द्र सञ्चालनमा ल्याइएको हो। प्रशिक्षण केन्द्र पोखराले ४ लाख ७२ हजार ५ सय रुपैयाँ र सहकारीले ५२ हजार ५ सय रुपैयाँ लगानी गरेका छन्।

चिस्यान केन्द्रमा ५ सय लिटर क्षमताको मिल्क चिलिङ मेसिन जडान गरिएको छ। त्यस्तै मिल्क एनालाइजर, प्रिन्टर, मिल्क क्यान र सेन्ट्रिफ्युज मेसिनसमेत खरिद गरेर सञ्चालनमा ल्याइएको छ।

केन्द्रमा संकलन गरिएको दूधमा फ्याट र ल्याक्टोजको मात्रा परीक्षण गरी सोही आधारमा किसानलाई दूधको मूल्य निर्धारण गरिनेछ।

किसानलाई उत्पादनमा आधारित अनुदान

चिस्यान केन्द्र सञ्चालन कार्यक्रममा गाउँपालिका अध्यक्ष प्रकाश तिवारीले किसानले दूध बिक्रीबाट कम मूल्य पाउने अवस्थाको क्षतिपूर्ति गर्न पालिकाले उत्पादनका आधारमा मासिक अनुदान दिने बताए।

उनका अनुसार सहकारीमार्फत उन्नत जातका भैंसी खरिद गर्दा लिएको ऋणको ब्याजमा ५० प्रतिशत अनुदानसमेत पालिकाले उपलब्ध गराउनेछ।

पालिकामा राज्यको सहयोगमा दुग्ध चिस्यान केन्द्रको भवन बने पनि लामो समय प्रयोगमा आउन नसकेको बताउँदै तिवारीले अब यसलाई प्रभावकारी रूपमा सञ्चालन गर्ने बताए। चिस्यान केन्द्रलाई भविष्यमा डेरीका रूपमा विस्तार गर्ने योजना रहेको उनले जानकारी दिए।

सहकारीको ऋणले बढ्यो भैंसीपालन

सहकारीका अध्यक्ष खडानन्द पौडेलका अनुसार सहकारीले किसानलाई ७ प्रतिशत ब्याजदरमा ऋण उपलब्ध गराएपछि भैंसीपालनमा आकर्षण बढेको छ। चिस्यान केन्द्र सञ्चालनमा आएपछि किसानले उत्पादन गरेको दूधको बजार व्यवस्थापनमा थप सहज हुने उनले बताए।

चिस्यान केन्द्र सञ्चालनको पहिलो दिन किसानबाट ४८.५ लिटर दूध संकलन भएको अध्यक्ष पौडेलले जानकारी दिए।

कार्यक्रममा वडा नं. १ का अध्यक्ष रणबहादुर थापा, वडा नं. २ का अध्यक्ष धनबहादुर गुरुङ, वडा नं. ३ का अध्यक्ष शोभाकान्त काफ्ले, पालिका कृषि प्रमुख डोलराज गैरे, सहकारी ऋण उपसमिति संयोजक तारापति पौडेललगायतले दुग्ध उत्पादन र किसानको आयआर्जन बढाउन चिस्यान केन्द्रले सहयोग गर्ने बताए।

Originally published on abcnews.com.np.