काठमाडौं । धितोपत्र तथा बीमासम्बन्धी कसूरमा संलग्न रहेको आरोपमा माइक्रो इन्स्योरेन्स कम्पनीसँग आबद्ध चार जना सञ्चालकलाई नेपाल प्रहरीको केन्द्रीय अनुसन्धान ब्युरो (सीआईबी)ले पक्राउ गरेको छ।

पक्राउ पर्नेमा काठमाडौँ महानगरपालिका–३२ निवासी ४२ वर्षीय सुभाष पौडेल, ललितपुर महानगरपालिका–२ निवासी ४१ वर्षीया सुनिता महर्जन, काठमाडौँ–१६ निवासी ४५ वर्षीय अनुप मालाकार र काभ्रेपलाञ्चोकको भुम्लु गाउँपालिका–८ निवासी ३९ वर्षीया सुनिता श्रेष्ठ रहेका छन्।

पक्राउ परेका पौडेल हिमालयन इन्भेस्टमेन्ट बैंकर लिमिटेडका सदस्य हुन्। महर्जन क्रेस्ट माइक्रो लाइफ इन्स्योरेन्सका सञ्चालक सदस्य रहेकी छन् भने मालाकार र श्रेष्ठ नेपाल माइक्रो इन्स्योरेन्स लिमिटेडसँग आबद्ध सञ्चालक सदस्य रहेको सीआईबीले जनाएको छ।

सीआईबीका अनुसार उनीहरूमाथि धितोपत्र सम्बन्धी ऐन, २०६३ तथा बीमा ऐन, २०७९ अन्तर्गत कसूर गरेको आरोपमा अनुसन्धान भइरहेको छ।

सेबोन र बीमा प्राधिकरणको प्रतिवेदनका आधारमा अनुसन्धान

नेपाल धितोपत्र बोर्ड र नेपाल बीमा प्राधिकरणले गरेको प्रारम्भिक जाँचबुझबाट प्राप्त प्रतिवेदनका आधारमा सीआईबीले घटनाको अनुसन्धान अघि बढाएको हो।

अनुसन्धानकै क्रममा धितोपत्र तथा बीमासम्बन्धी कानुन उल्लङ्घन गरेको आरोपमा चारै जनालाई पक्राउ गरिएको प्रहरीले जनाएको छ। यसअघि उनीहरू फरार रहेको बताइएको छ।

पक्राउ परेका चारै जनालाई मंगलबार जिल्ला अदालत काठमाडौंमा उपस्थित गराइएको छ। घटनासम्बन्धी थप अनुसन्धान जारी रहेको सीआईबीले जनाएको छ।

Originally published on abcnews.com.np.