काठमाडौं । भोटेकोशी बाढीपछि बसेको सर्वदलीय बैठकले विपद् व्यवस्थापन, नागरिकको जीवनरक्षा र राष्ट्रिय हितका विषयमा राजनीतिक दलहरू एक ठाउँमा उभिने सन्देश दिएको छ।

बैठकपछि आठ राजनीतिक दलले संयुक्त वक्तव्य जारी गर्दै वैचारिक मतभेदभन्दा माथि उठेर विपद्को सामना गर्ने प्रतिबद्धता जनाएका छन्। उनीहरूले तत्कालीन उद्धार तथा राहतसँगै दीर्घकालीन पुनर्निर्माण, जोखिम न्यूनीकरण र विपद् पूर्वतयारीका लागि १० बुँदे साझा संकल्प गरेका हुन्।

संकल्पपत्रमा रास्वपा सभापति रवि लामिछाने, कांग्रेस सभापति गगन थापा, नेकपा संयोजक पुष्पकमल दाहाल ‘प्रचण्ड’, एमाले महासचिव शंकर पोखरेल, श्रम संस्कृतिबाट ध्रुव राई, राप्रपा अध्यक्ष राजेन्द्र लिङ्देन, जसपा नेपालका अध्यक्ष उपेन्द्र यादव र जनमत पार्टीका अध्यक्ष चन्दन सिंहले हस्ताक्षर गरेका छन्।

विपद्को राजनीतिकरण नगर्न आग्रह

दलहरूले विपद् व्यवस्थापनलाई राजनीतिक स्वार्थबाट अलग राख्नुपर्नेमा जोड दिएका छन्। विपद्का बेला गरिने सहयोगलाई सस्तो लोकप्रियता वा राजनीतिक स्वार्थपूर्तिको माध्यम नबनाउन आग्रह गरिएको छ।

राजनीतिक दल, भ्रातृ तथा जनसंगठन र सदस्यहरूलाई उद्धार तथा राहतमा विशुद्ध मानवीय स्वयंसेवकका रूपमा परिचालित हुन आह्वान गरिएको छ।

त्यस्तै, आर्थिक सहयोग संकलनलाई पारदर्शी र व्यवस्थित बनाउन प्रधानमन्त्री दैवी प्रकोप उद्धार कोष वा सरकारले तोकेको आधिकारिक खातामा मात्र रकम जम्मा गर्न आग्रह गरिएको छ।

सामाजिक सञ्जालमा जिम्मेवार हुन आग्रह

संयुक्त वक्तव्यमा सामाजिक सञ्जालको विवेकपूर्ण तथा जिम्मेवार प्रयोगमा समेत जोड दिइएको छ।

आधिकारिक निकायबाट प्रमाणित सूचना मात्र सम्प्रेषण गर्न तथा विपद्सँग सम्बन्धित संवेदनशील सूचना प्रवाह गर्दा संयम अपनाउन नागरिक तथा सञ्चारमाध्यमलाई आग्रह गरिएको छ।

Originally published on abcnews.com.np.