एजेन्सी, ५ वैशाख ।अमेरिकी अनुसन्धानकर्ताहरुले एड्स रोगको उपचार सम्भव भएको दावि गरेका छन् । उनीहरुले यसको औषधी गाईको पेटमा रहेको निष्र्कषमा पुगेका छन्।

अमेरिकाको नेशनल इन्स्टिच्युट अफ हेल्थका अनुसन्धानकर्ताका अनुसार गाईले यस्तो ब्‍याक्टरिया युक्त एन्टीबडीज उत्पादन गर्छ जसले एचआइभी एड्सको भाईरसलाई समेत नष्ट गरिदिन्छ।

इन्स्टिच्युटका अनुसन्धानकर्ताहरुले भनेका छन्, ‘ गाईमा धेरै कडा प्रकृतिको ब्‍याक्टेरिया युक्त पाँचन तन्त्र हुन्छ जसले प्रतिरक्षा प्रणालीभन्दा कैयौ गुणा विकसित हुन्छ। यसले एचआइभीको भाइरससँग भीडेर जित्‍न सक्छ।’

यस्तै नेशनल इन्स्टिच्युट अफ एलर्सी एण्ड इन्फेक्सियस डिजिजका शोधकर्ताहरुले गाईको प्रतिरक्षा प्रणाली तीव्रगतिको रहेको र एचआइभीको भाइरसलाई सजिलै हराउन सक्‍ने दाबी गरेका छन्।

एक अनुसन्धाकर्ता डाक्टर डेभिन शोकले बीबीसीसँग भनेका छन्, ‘हामीले गाईको प्रतिरक्षा प्रणालीको परीक्षण सुरु गर्‍यौ। जब थाहा पायौ हामी नै चकित भयौ। यसको एन्डीबडीजमा हामीले कयौ गुणा धेरै प्रतिरक्षा प्रणाली भेट्यौ जसले एड्स निर्मूल पार्न महत्वपूर्ण भूमिका खेल्छ।’

यता, नेचर नामक जर्नलमा प्रकाशित रिपोर्ट अनुसार गाईको एन्टीबडीजबाट एचआइभीको असरलाई ४२ दिनमा २० प्रतिशतसम्म निको पार्न सक्छ। प्रयोगशाला परीक्षणमा पत्त लागे अनुसार ३८२ दिनमा यो एन्टीबडीज ९६ प्रतिशतसम्म एचआइभीलाई असर गर्न सक्छ।