रसुवा । रसुवास्थित भोटेकोसी नदीमा पानीको बहाव फेरि बढेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले शुक्रबार सूचना जारी गर्दै भोटेकोसी नदीमा लेदोसहित पानीको बहाव केही बढेको जनाएको हो। प्राधिकरणका अनुसार यसअघि बुधबार ठूलो बाढी आएको क्षेत्रमै पानीको बहाव बढेको हो। थप बाढी आउन सक्ने जोखिम रहेकाले नदी किनारमा उद्धार तथा राहत कार्यमा खटिएका सुरक्षाकर्मी, उद्धारकर्मी तथा जोखिम क्षेत्रमा रहेका सर्वसाधारणलाई उच्च सतर्कता अपनाउन आग्रह गरिएको छ।भोटेकोसी तथा त्रिशूली नदी किनारमा रहेका नागरिकलाई जोखिमको अवस्था देखिएमा तत्काल सुरक्षित स्थानतर्फ जान प्राधिकरणले अनुरोध गरेको छ। यसअघि गोसाइँकुण्ड गाउँपालिकाका अध्यक्ष कैसाङ नुर्पु तामाङले चीनको सीमा क्षेत्रमा नदी थुनिएर बनेको ठूलो ताल फुटेको सूचना प्राप्त भएको बताएका थिए। उनका अनुसार चीनको छोचेन खोला र पुरेपु त्साङ्पो नदीको संगम क्षेत्रमा ताल फुटेको खबर आएको हो। तालमा कम्तीमा २० लाख घनमिटर पानी जम्मा भएको हुनसक्ने विज्ञहरूको प्रारम्भिक अनुमान छ। यद्यपि ताल कति र कसरी फुटेको हो भन्ने विषयमा यकिन विवरण प्राप्त भइसकेको छैन। ताल फुटेपछि बाढीको जोखिम बढेको भन्दै चीनले तिब्बतको केरुङ सीमा क्षेत्रतर्फ उद्धार कार्यसमेत अस्थायी रूपमा रोकेको बताइएको छ। बीबीसीका अनुसार नेपाल–तिब्बत सीमा क्षेत्रको ग्यारियोङ बन्दरगाहको माथिल्लो भागमा बनेको तालमा पानीको सतह बढेपछि चिनियाँ अधिकारीहरूले उद्धारकर्मीलाई काम रोक्न निर्देशन दिएका छन्। चिनियाँ उद्धार टोलीलाई करिब एक किलोमिटर पछाडि हट्न समेत भनिएको जनाइएको छ। यसैबीच, नेपालतर्फ पनि भोटेकोसी र त्रिशूली नदीमा पानीको बहाव बढ्न सक्ने सम्भावनालाई मध्यनजर गर्दै सुरक्षा निकाय तथा स्थानीय प्रशासनलाई सतर्क अवस्थामा राखिएको छ।

Originally published on abcnews.com.np.