काठमाडौं । रसुवाको उत्तरगया गाउँपालिकाका एक जना जनप्रतिनिधि सम्पर्कविहीन भएका छन् । गाउँपालिकाका प्रवक्ता टुकुप्रसाद सुवेदीका अनुसार गाउँपालिका सदस्य ज्ञानु विक खाल्टेबगर क्षेत्रबाट सम्पर्कविहीन भएका हुन् ।

घटनाका क्रममा विकले अन्य व्यक्तिलाई समेत भाग्न आग्रह गरेको जानकारी आएको सुवेदीले बताए ।

‘उहाँले नै अरूलाई ‘ल, भाग–भाग’ भन्दै हुनुहुन्थ्यो रे । त्यसपछि भाग्दै गर्दा उहाँ सम्पर्कविहीन हुनुभएको हो,’ सुवेदीले भने, ‘यसअघि पनि भूकम्पबाट प्रभावित भएर उहाँ त्यो ठाउँमा बस्दै आउनुभएको थियो ।’

उनका अनुसार गाउँपालिका सदस्य विकका परिवारका सदस्यसमेत सम्पर्कमा छैनन् । उत्तरगया गाउँपालिकामा एक हजारभन्दा बढी व्यक्ति सम्पर्कविहीन रहेको प्रारम्भिक आकलन गरिएको प्रवक्ता सुवेदीले बताए ।

उद्धार तथा खोजी कार्यमा सरकारले तदारुकता देखाएको उनको भनाइ छ ।

‘दिनमा पाँचवटा हेलिकोप्टर यही क्षेत्रमा तैनाथ छन्,’ उनले भने, ‘उद्धार कार्य भइरहेको छ । जमिनमुनि परेका मानिसको खोजी, बगाएर लगेको शवको पहिचान तथा खोजतलासलगायत सबै काम भइरहेको छ ।’

Originally published on abcnews.com.np.