काठमाडौं । भारतको चालु आर्थिक वर्ष २०२६–२७ को पहिलो त्रैमासिक अर्थात् अप्रिलदेखि जुनसम्ममा वास्तविक कुल गार्हस्थ्य उत्पादन (जीडीपी) ७.८ प्रतिशतले वृद्धि भएको छ । भारतीय रिजर्भ बैंक (आरबीआई) ले यस अवधिमा ७ प्रतिशत आर्थिक वृद्धि हुने अनुमान गरेकोमा वास्तविक वृद्धि अपेक्षाभन्दा बढी भएको हो ।

भारतको तथ्यांक तथा कार्यक्रम कार्यान्वयन मन्त्रालयका अनुसार समीक्षा अवधिमा भारतको वास्तविक जीडीपी करिब ८१.३६ लाख करोड भारतीय रुपैयाँ पुगेको छ । अघिल्लो आर्थिक वर्षको सोही अवधिमा यो करिब ७५.४६ लाख करोड रुपैयाँ रहेको थियो । विश्वव्यापी आर्थिक अनिश्चितता, इन्धनको मूल्यवृद्धि तथा आपूर्ति शृंखलामा देखिएका समस्याका बाबजुद भारतीय अर्थतन्त्रले बलियो वृद्धि हासिल गरेको बताइएको छ ।

भारतीय प्रधानमन्त्री नरेन्द्र मोदीले जीडीपी वृद्धिलाई ठूलो उपलब्धिका रूपमा व्याख्या गर्दै निराशावादीहरू गलत साबित भएको टिप्पणी गरेका छन् । सामाजिक सञ्जाल एक्समार्फत उनले भारतीय नागरिकहरूको सामूहिक प्रयासका कारण अर्थतन्त्रले अपेक्षाअनुसारभन्दा राम्रो प्रदर्शन गरेको बताएका छन् ।

तर प्रमुख विपक्षी दल कांग्रेसले भने आर्थिक वर्ष २०२६–२७ को पहिलो त्रैमासिकमा देखिएको ७.८ प्रतिशत जीडीपी वृद्धिको तथ्यांकलाई अर्थतन्त्रको ‘अत्यधिक विकृत चित्र’ भन्दै आलोचना गरेको छ । कांग्रेसले सरकारी तथ्यांकले वास्तविक आर्थिक अवस्थालाई पूर्ण रूपमा प्रतिबिम्बित नगरेको दाबी गरेको छ ।

Originally published on abcnews.com.np.