काठमाडौं । नेकपा (एमाले) संसदीय दलका नेता रामबहादुर थापा ‘बादल’ले प्रधानमन्त्री वालेन्द्र शाहले आफ्नो शासन शैलीमा गुणात्मक परिवर्तन गर्नुपर्ने बताउनुभएको छ । बुधबार प्रतिनिधिसभा बैठकमा बोल्दै थापाले सामूहिक र संगठित प्रयासबाट मात्रै विपद्को जोखिम न्यूनीकरण तथा व्यवस्थापन गर्न सकिने बताउनुभयो । वर्षेनी हुने बाढीपहिरोबाट हुने क्षति रोक्न र प्रभावकारी विपद् व्यवस्थापनका लागि सरकार गम्भीर हुनुपर्ने उहाँको भनाइ थियो । प्राकृतिक विपत्तिमा ज्यान गुमाउनेहरूप्रति हरेक वर्ष श्रद्धाञ्जली अर्पण गर्ने परम्परा मात्र निभाउनुभन्दा यो नियति बदल्ने दृढ सङ्कल्पका साथ अघि बढ्नुपर्ने उहाँले बताउनुभयो । राज्यको प्रमुख नेतृत्वका रूपमा प्रधानमन्त्री शाहले आफ्नो ‘एकाङ्की शासन शैली’मा परिवर्तन गर्नुपर्ने थापाको तर्क थियो । सरकार संसद्प्रति पूर्णतः उत्तरदायी हुनुपर्ने र आफ्ना योजना तथा कामकारबाहीबारे संसद्लाई निरन्तर जानकारी गराउनुपर्ने उहाँले बताउनुभयो । विद्यमान सङ्कटको सामना राष्ट्रिय सहमतिबाट मात्रै सम्भव हुने उल्लेख गर्दै थापाले राजनीतिक दल, नागरिक समाज र विज्ञहरू सम्मिलित बहुपक्षीय संयन्त्र निर्माण गर्न सरकारलाई सुझाव दिनुभयो । सरकारको कामकारबाहीमा सहजीकरण तथा निगरानी गर्न सभामुखमार्फत विशेष संसदीय समिति गठन गर्नुपर्ने प्रस्तावसमेत उहाँले अघि सार्नुभयो । विपद् व्यवस्थापनका लागि विभिन्न मन्त्रालयको नेतृत्वमा विशेष कार्यदल गठन गर्नुपर्ने उहाँको माग थियो । अन्तर्राष्ट्रिय सहयोग, क्षतिपूर्ति र समन्वयका लागि परराष्ट्रमन्त्रीको नेतृत्वमा, युद्धस्तरमा उद्धार तथा राहत कार्य सञ्चालन गर्न रक्षामन्त्रीको नेतृत्वमा र पुनर्निर्माणका लागि अर्थमन्त्रीको नेतृत्वमा छुट्टाछुट्टै विशेष कार्यदल (टास्क फोर्स) गठन गर्नुपर्ने थापाले बताउनुभयो । जलवायु परिवर्तनबाट सिर्जित सङ्कटको सामना गर्न अन्तर्राष्ट्रिय ऐक्यबद्धता जुटाउन र आवश्यक रणनीति तय गर्न सरकारले ‘सगरमाथा संवाद’को दोस्रो संस्करण तत्काल अघि बढाउनुपर्नेमा उहाँले जोड दिनुभयो ।

Originally published on abcnews.com.np.