काठमाडौँ, भदौ १७ गते । प्रतिनिधिसभा बैठकमा राष्ट्रिय प्रजातन्त्र पार्टी (राप्रपा) नेपालका सांसद ज्ञानेन्द्रबहादुर शाहीले विपद्को समयमा आरोप–प्रत्यारोप र राजनीतिकरण नगरी उद्धार तथा राहतमा केन्द्रित हुन सरकारसँग आग्रह गर्नुभएको छ ।

बुधबार प्रतिनिधिसभा बैठकमा बोल्दै शाहीले राज्यका स्रोत–साधन परिचालन गर्ने जिम्मेवारी सरकारको भएको बताउँदै विपद्का बेला आवश्यक उपकरण तत्काल परिचालन गर्न माग गर्नुभयो । स्थानीय तहलाई समेत प्रभावकारी रूपमा परिचालन गर्नुपर्ने उहाँको भनाइ थियो । आफूहरू सरकारको साथमा रहेको बताउँदै उहाँले आवश्यक स्थानमा परिचालन हुन तयार रहेको उल्लेख गर्नुभयो । विपद्का बेला आफ्नो ज्यानको पर्वाह नगरी उद्धारमा खटिने सुरक्षाकर्मीको योगदानको प्रशंसा गर्दै शाहीले उनीहरूको तलब वृद्धि गर्नुपर्ने सुझावसमेत दिनुभयो । नेपालले जलवायु परिवर्तनका कारण ठूलो क्षति व्यहोर्नुपरेको उल्लेख गर्दै उहाँले विकसित तथा सम्पन्न राष्ट्रहरूले आफ्नो सुखसुविधाका लागि अत्यधिक कार्बन उत्सर्जन गरिरहेको बताउनुभयो । नेपालजस्ता मुलुकले कार्बन उत्सर्जन घटाउन तत्काल पहल गर्नुपर्नेमा जोड दिँदै उहाँले जलवायु परिवर्तनको विषयलाई अन्तर्राष्ट्रिय अदालतसम्म लैजानुपर्ने आवश्यकता औँल्याउनुभयो । विपद्को समयमा कसैलाई आरोप लगाउने बेला नभएको भन्दै शाहीले सरकारलाई सम्पूर्ण ध्यान उद्धार कार्यमा केन्द्रित गर्न आग्रह गर्नुभयो ।

Originally published on abcnews.com.np.