काठमाडौं । एनसेलका प्रमुख कार्यकारी अधिकृत (सीईओ) माइकल फोलेले राजीनामा दिएका छन्। २०८२ कात्तिक १५ गतेदेखि सीईओको जिम्मेवारी सम्हाल्दै आएका फोलेको राजीनामा एनसेल सञ्चालक समितिले स्वीकृत गरेको हो।

समितिले भदौ ९ गतेदेखि लागू हुने गरी नयाँ सीईओ नियुक्त नभएसम्मका लागि प्रमुख कर्पोरेट तथा नियामकीय मामिला अधिकृत डिल्लीराम श्रेष्ठलाई अन्तरिम सीईओको जिम्मेवारी दिएको छ।

नयाँ सीईओ नियुक्त नभएसम्मका लागि आवश्यक ‘लिमिट अफ अथोरिटी’ समेत श्रेष्ठलाई प्रदान गरिएको एनसेलले जनाएको छ।

उच्च व्यवस्थापनमा थप फेरबदल

सीईओको राजीनामासँगै एनसेलले आफ्नो उच्च व्यवस्थापनमा समेत फेरबदल गरेको छ। स्रोतका अनुसार नेपाली सेनाका अवकाशप्राप्त **मेजर जनरल सन्तोषकुमार ढकाललाई ‘चिफ अफ स्टाफ’**को जिम्मेवारी दिइएको छ।

त्यस्तै, कर्पोरेट कम्युनिकेसन तथा सस्टेनिबिलिटी निर्देशक विशाखा लक्ष्मी खड्कालाई एनसेल फाउन्डेसनको निर्देशकको जिम्मेवारी दिइएको छ।

एनसेलले व्यवस्थापनमा भएको फेरबदलसम्बन्धी जानकारी भदौ १६ गते नै नियामक नेपाल दूरसञ्चार प्राधिकरणलाई पत्रमार्फत गराइसकेको छ। प्राधिकरणका एक अधिकारीले एनसेलको सीईओ परिवर्तनसम्बन्धी पत्र प्राप्त भएको पुष्टि गरेका छन्।

स्मार्ट टेलिकमको सम्पत्तिसम्बन्धी मुद्दाको प्रभाव?

पछिल्लो समय सरकारको स्वामित्वमा गइसकेको स्मार्ट टेलिकमको सम्पत्ति नेपाल इन्भेष्टमेन्ट मेगा बैंकले एनसेललाई बिक्री गरेको विषयमा बैंक तथा एनसेलका अधिकारीविरुद्ध मुद्दा दायर भएको छ।

उक्त मुद्दाका कारण फोलेलाई नेपालमा बसेर काम गर्न असहज अवस्था सिर्जना भएपछि उनले राजीनामा दिएको बुझिएको छ। यद्यपि, केही समयअघि नेपाल आएर कार्यालयसमेत पुगेका फोलेले आफ्ना सहकर्मीहरूलाई पारिवारिक दायित्वका कारण जिम्मेवारी छाड्न लागेको जानकारी गराएको स्रोतको भनाइ छ।

Originally published on abcnews.com.np.