काठमाडौँ  । रसुवामा आएको विनाशकारी बाढीमा परी ज्यान गुमाउनेको संख्या १ हजार २९० पुगेको छ । नेपाल प्रहरीले दिएको पछिल्लो विवरणअनुसार बाढीपछि सम्पर्कविहीन भएका ४ हजार ७९८ जना अझै बेपत्ता छन् ।

नेपाल प्रहरीका केन्द्रीय प्रहरी प्रवक्ता एवं प्रहरी नायब महानिरीक्षक अविनारायण काफ्लेका अनुसार फेला परेका शवमध्ये ३४ बालक, ४५ बालिका, २५० महिला र ४२७ पुरुष छन् । त्यस्तै, आंशिक अङ्गसहितका ५३२ शव फेला परेका छन् । उपचारका क्रममा अस्पतालमा दुई जनाको मृत्यु भएको प्रहरीले जनाएको छ ।

बेपत्ता हुनेमा २ हजार ३६९ पुरुष र ४७८ महिला छन् । फोनमार्फत जानकारी प्राप्त भएका १ हजार ३५० जना तथा ६०१ जना विदेशी नागरिकसमेत बेपत्ताको सूचीमा रहेको प्रवक्ता काफ्लेले जानकारी दिनुभयो ।

उद्धार कार्य जारी, ८ हजार १९७ जनाको उद्धार

प्रहरी प्रधान कार्यालयका अनुसार बाढीपछि हालसम्म ८ हजार १९७ जनाको उद्धार गरिएको छ । उद्धार गरिएकामध्ये ४ हजार ६१८ पुरुष र २ हजार ४७२ महिला छन् ।

त्यस्तै, ९०३ विदेशी पुरुष र १५२ विदेशी महिलाको समेत उद्धार गरिएको प्रहरीको तथ्याङ्कमा उल्लेख छ । उद्धार गरिएकामध्ये पहिचान नखुलेका ५२ जना पनि छन् ।

सम्भावित स्थानमा खोजी तीव्र

बाढीपछि ठूलो संख्यामा मानिस सम्पर्कविहीन रहेकाले नेपाली सेना, नेपाल प्रहरी, सशस्त्र प्रहरी बल, स्थानीय तह तथा अन्य सरोकारवाला निकायको समन्वयमा खोजी अभियान जारी छ ।

बाढी प्रभावित विभिन्न स्थानमा सम्भावित क्षेत्र पहिचान गरी खोजी गर्ने, फेला परेका शवको पहिचान गर्ने, अभिलेखीकरण गर्ने तथा आवश्यक प्रक्रिया पूरा गरी व्यवस्थापन गर्ने काम भइरहेको प्रहरीले जनाएको छ ।

बेपत्ताको पहिचानका लागि डीएनए परीक्षण

मृतक र बेपत्ताको पहिचान सहज बनाउन डीएनए परीक्षणको प्रक्रिया अघि बढाइएको छ । प्रहरीले मृतक १ हजार १४३ जना र मृतकका आफन्त ७१९ जनासहित १ हजार ८६२ जनाको डीएनए नमुना सङ्कलन गरेको जनाएको छ ।

यसबाट पहिचान नखुलेका शव तथा लामो समयदेखि सम्पर्कविहीन व्यक्तिको अवस्थाबारे यकिन गर्न सहज हुने अपेक्षा गरिएको छ ।

९२६ शवको व्यवस्थापन

प्रहरीका अनुसार हालसम्म ९२६ शव सुरक्षित रूपमा जमिनमा व्यवस्थापन गरिएको छ । आवश्यक प्रक्रिया पूरा गरी शव व्यवस्थापन गर्ने कार्य निरन्तर भइरहेको छ ।

प्राप्त सूचना र परिवारजनबाट आउने विवरणका आधारमा बेपत्ताको तथ्याङ्कसमेत अद्यावधिक भइरहेको प्रहरीले जनाएको छ ।

भोटेकोशी बाढीपछि उद्धार, खोजी, शव व्यवस्थापन तथा बेपत्ताको पहिचानका लागि राज्यका विभिन्न निकाय परिचालन भइरहेका छन् । लामो समयदेखि सम्पर्कविहीन रहेका व्यक्तिको अवस्थाबारे जानकारी प्राप्त गर्न सम्भावित स्थानमा खोजी अभियानलाई थप प्रभावकारी बनाउँदै लगिएको प्रहरीले जनाएको छ ।

Originally published on abcnews.com.np.