काठमाडौं । भोटेकोसी बाढी तथा त्यससँग सम्बन्धित विपद्मा परी ज्यान गुमाएका १ हजार २ सय ८७ जनाको शव फेला परेको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार शुक्रबार मध्याह्नसम्म फेला परेका शवमध्ये सबैभन्दा धेरै चितवनमा ३ सय ५९रहेका छन्। तर, तीमध्ये हालसम्म ९६ जनाको मात्रै सनाखत भएको छ।

प्राधिकरणको विवरणअनुसार नवलपरासी पूर्वमा २ सय १९, नवलपरासी पश्चिममा २ सय १२, नुवाकोटमा १ सय ८४, रसुवामा १ सय ४०, गोरखामा ७२, धादिङमा ६३ र तनहुँमा ३८ जनाको शव फेला परेको छ।

विपद्का क्रममा हालसम्म ५ हजार ३ सय ९७ जना घाइते भएका छन्। घाइतेहरूको विभिन्न अस्पताल तथा नेपाली सेना र सशस्त्र प्रहरी बलका स्वास्थ्यकर्मीमार्फत उपचार भइरहेको प्राधिकरणले जनाएको छ।

५ हजारभन्दा बढी अझै सम्पर्कविहीन

सुरक्षा निकायले उद्धार कार्यलाई तीव्रता दिँदै हालसम्म १३ हजार ९३ जनालाई सुरक्षित स्थानमा पुर्‍याएको छ।

शुक्रबार मात्रै माथिल्लो त्रिशूली ‘थ्री ए’ जलविद्युत् आयोजनाको सुरुङबाट दुई जनाको जीवितै उद्धार गरिएको छ।

तर, अझै ५ हजार ८३ जना सम्पर्कविहीन रहेको प्राधिकरणले जनाएको छ। तीमध्ये ५ सय ८३ जना विदेशी नागरिक छन्।

सम्पर्कविहीनमध्ये रसुवाका २ हजार १ सय ३० र नुवाकोटका २ हजार ३ सय ४० जना रहेका छन्। फेला परेका तर पहिचान हुन नसकेका शवसमेत सम्पर्कविहीनको संख्यामा समावेश भएको हुनसक्ने प्राधिकरणको अनुमान छ।

२१ हजारभन्दा बढी सुरक्षाकर्मी परिचालित

विपद् व्यवस्थापन तथा उद्धारका लागि देशभर २१ हजार ४ सय २१ सुरक्षाकर्मी परिचालन गरिएको छ।

जसमध्ये नेपाली सेनाका ९ हजार २ सय ८७, नेपाल प्रहरीका ७ हजार ९ सय ३१ र सशस्त्र प्रहरी बलका ४ हजार २ सय ३ जना छन्।

उद्धार तथा राहतका लागि नेपाली सेनाले हालसम्म ८ सय ३० पटक र निजी क्षेत्रले १ सय २९ पटक हेलिकप्टर उडान गरेका छन्। हेलिकप्टरमार्फत उद्धार गरिएकामध्ये ३ सय ३ जना विदेशी नागरिक रहेको प्राधिकरणले जनाएको छ।

७ हजारभन्दा बढी घरमा क्षति

प्रारम्भिक मूल्यांकनअनुसार बाढी तथा विपद्बाट ७ हजार ५ सय ७० निजी घरमा क्षति पुगेको छ। त्यस्तै ४८ सरकारी संरचना, १८ विद्यालय र ७ स्वास्थ्य संस्थामा पूर्ण तथा आंशिक क्षति भएको छ।

यातायात पूर्वाधारतर्फ ५५ किलोमिटर सडक पूर्ण रूपमा क्षतिग्रस्त भएको छ। ३७ वटा मोटरेबल पुल र ६८ वटा झोलुङ्गे पुलमा समेत क्षति पुगेको छ।

प्रारम्भिक अनुमानअनुसार विपद्बाट भएको कुल आर्थिक क्षति तथा नोक्सानी ३ खर्ब ८७ अर्ब ५४ करोड रुपैयाँ पुगेको छ। शीघ्र पुनर्लाभका लागि मात्रै ७ अर्ब १५ करोड रुपैयाँ आवश्यक पर्ने देखिएको प्राधिकरणले जनाएको छ।

राहत ढुवानी तीव्र

प्रभावित क्षेत्रमा राहत सामग्री पुर्‍याउने कामलाई सरकारले प्राथमिकता दिएको छ।

काठमाडौंबाट ६९ ट्रक र ३८ बोलेरोमार्फत खाद्यान्न तथा गैरखाद्यान्न सामग्री प्रभावित क्षेत्रमा पठाइएको छ। सशस्त्र प्रहरीले १६३ हवाई उडानमार्फत नुवाकोट र रसुवामा राहत सामग्री पुर्‍याएको जनाएको छ।

सरकारले रसुवा र नुवाकोटलाई १/१ करोड रुपैयाँ, धादिङलाई ५० लाख रुपैयाँ तथा प्रभावित १५ स्थानीय तहलाई १३ करोड ५० लाख रुपैयाँ नगद राहत उपलब्ध गराएको छ।

बाढीका कारण अवरुद्ध सञ्चार सेवा पनि क्रमशः सञ्चालनमा आउन थालेका छन्।

नेपाल टेलिकमका १२० मध्ये ११६ वटा टावर र एनसेलका ७८ मध्ये ७५ वटा टावर सञ्चालनमा आइसकेका छन्।

प्राधिकरणले सम्पर्कविहीन विदेशी नागरिक तथा उद्धार गरिएका व्यक्तिहरूको विस्तृत विवरण आफ्नो आधिकारिक वेबसाइट तथा फेसबुक पेजमार्फत सार्वजनिक गरिएको जनाएको छ।

Originally published on abcnews.com.np.