काठमाडौं । गृहमन्त्री सुदन गुरुङले विपद्का बेला मन्त्रालयको कुर्सीमा बसेर कागजात हेर्ने पुरानो शैलीको नेतृत्वभन्दा आफू फिल्डमै पुगेर प्रत्यक्ष रूपमा काम गर्ने पक्षमा रहेको बताएका छन् ।

शुक्रबार बिहान माथिल्लो त्रिशूली–३ ‘ए’ जलविद्युत् आयोजनाको सुरुङबाट दुई जनाको जीवितै उद्धार भइरहँदा गृहमन्त्री गुरुङ घटनास्थल पुगेका थिए । उद्धार गरिएका जलविद्युत् आयोजनाका कर्मचारीलाई घटनास्थलबाट हेलिकप्टरसम्म पुर्‍याउने कार्यमा समेत उनी सक्रिय देखिएको भिडियो सार्वजनिक भएपछि सामाजिक सञ्जालमा उनको शैलीबारे आलोचना भएको थियो ।

त्यसको जवाफ दिँदै गुरुङले आफूलाई पुराना शैलीका राज्य सञ्चालकजस्तो मन्त्रालयको कुर्सीमा बसेर कागजात समात्ने नेताका रूपमा मात्र नबुझ्न आग्रह गरेका छन् ।

‘यदि पुरानो शैलीमा नेतृत्वलाई मन्त्रालयको कुर्सीमा बसेर कागजात समात्ने कुरासँग जोडेर हेर्नुहुन्छ भने, तपाईं गलत युगमा हुनुहुन्छ, जेनेरेसन ग्याप,’ उनले सामाजिक सञ्जालमा लेखेका छन् ।

गुरुङका अनुसार विषयगत मन्त्रालयका उच्चपदस्थ अधिकारीहरूको उपस्थितिमा विपद् प्रतिकार्य कमान्ड सेन्टर पूर्ण रूपमा सञ्चालनमा रहेको छ । उनले आफूले हरेक चार घण्टामा कमान्ड सञ्चालन तथा रणनीतिक बैठकहरू अनलाइन माध्यमबाट गरिरहेको दाबी गरेका छन् ।

‘वर्षौँदेखि हामीले फिल्डको वास्तविक स्थिति नबुझी कुर्सीबाट मात्र नेतृत्व गर्दाको परिणाम भोग्दै आएका छौँ,’ उनले लेखेका छन्, ‘उही पुरानै प्रणालीबाट भिन्न र उत्कृष्ट परिणामको आशा गर्दै केही व्यक्तिहरूले अझै पनि हामीलाई त्यही पुरानै शैली अपनाउन दबाब दिएको देख्दा मलाई अचम्म लाग्छ।’

गृहमन्त्री गुरुङले डिजिटल माध्यमबाट भइरहेको समन्वय र निर्णय प्रक्रिया टेबल पछाडि बसेर काम गर्नुभन्दा छिटो र प्रभावकारी रहेको दाबी गरेका छन् ।

‘टेबल पछाडि बसेरभन्दा डिजिटल माध्यमबाट काम धेरै छिटो र प्रभावकारी रूपमा भइरहेको छ,’ उनले भनेका छन्, ‘त्यसैले म कहाँ बसेको छु भनेर चिन्ता गर्नुभन्दा परिणाममा ध्यान दिन अनुरोध गर्न चाहन्छु।’

Originally published on abcnews.com.np.