काठमाडौं । सुरुङभित्र खोजी तथा उद्धार कार्यलाई सुरक्षित र प्रभावकारी बनाउन स्विट्जरल्यान्डले नेपाललाई विशेष प्रकारको अत्याधुनिक ड्रोन उपलब्ध गराएको छ।

स्विट्जरल्यान्डले शनिबार उक्त ड्रोन नेपाल विद्युत् प्राधिकरणलाई हस्तान्तरण गरेको हो। ऊर्जा, जलस्रोत तथा सिँचाइमन्त्री विराज भक्त श्रेष्ठको सचिवालयको पहलमा ड्रोन प्राप्त भएको जनाइएको छ।

स्विट्जरल्यान्डको ड्रोन निर्माता कम्पनी ‘फ्लाईबिलिटी’ले निर्माण गरेको ड्रोन मानिस प्रवेश गर्न कठिन हुने अँध्यारा, साँघुरा र जोखिमपूर्ण सुरुङभित्र खोजी तथा निरीक्षणका लागि प्रयोग गर्न सकिन्छ।

ड्रोनमा विशेष सुरक्षा घेरा जडान गरिएको छ। जसका कारण सुरुङका भित्ता, चट्टान वा अन्य संरचनामा ठोक्किए पनि ड्रोनमा ठूलो क्षति नपुगी पुनः उडान गर्न सक्ने बताइएको छ।

सुरुङभित्रको अवस्थाबारे प्रत्यक्ष जानकारी लिन सकिने भएकाले यसले उद्धार टोलीलाई सम्भावित जोखिम पहिचान गर्न, फसेका व्यक्तिको अवस्थाबारे जानकारी संकलन गर्न तथा उद्धार रणनीति बनाउन सहयोग गर्ने अपेक्षा गरिएको छ।

नेपाल विद्युत् प्राधिकरणका अनुसार उद्धारकर्ता सुरुङभित्र प्रवेश गर्नुअघि ड्रोनमार्फत जोखिमको अवस्था पहिचान गर्न सकिने भएकाले कठिन परिस्थितिमा उद्धार कार्यलाई थप सुरक्षित र प्रभावकारी बनाउन प्रविधिले महत्वपूर्ण सहयोग पुग्नेछ।

Originally published on abcnews.com.np.