काठमाडौं, ९ वैशाख । कम्युनिष्ट पार्टीको स्थापना दिवसमा नै लेनिन र माओको तस्वीर विनाको हुनु आफूहरुको गल्ती भएको एमाले अध्यक्ष ( प्रधानमन्त्री ) केपी शर्मा ओली र माओवादी केन्द्रका अध्यक्ष प्रचण्डले स्वीकार गरेका छन् ।

दुबै पार्टीका शीर्ष नेताहरुको बैठकमा ओली र प्रचण्डले गल्ती स्वीकार गरेको एमाले निकट स्रोतले जानकारी दिएको छ । आफूहरुले ब्यानर बनाउन निर्देशन दिँदाखेरि नै कस्तो बनाउने भनेर निर्देशन दिनुपर्नेमा सो नगरिएकाले यस्तो परिस्थिति आएको भन्दै ओली र प्रचण्ड दुबैले यसमा अरुको नभई दुई अध्यक्षकै कमजोरी रहन गएको बैठकमा बताएका छन् ।

एमालेका एक नेताले दिएको जानकारी अनुसार अब एमाले र माओवादी दुबै पार्टीका आआफ्नै ब्यानरहरु राखेर कार्यक्रम अघि बढाउने सहमति भएको छ ।

एमालेका तर्फबाट पुरानै बोर्ड राखिने भएको छ भने माओवादीका तर्फबाट राखिने अर्को ब्यानर तयार भइरहेको छ ।
काठमाडौंका सभागृहमा १२ बजेदेखि गर्ने भनिएको संयुक्त कार्यक्रममा राखिएको बोर्डमा लेनिन र माओका तस्वीर नराखिएको भन्दै माओवादी कार्यकर्ताले नाराबाजी गरेपछि साढे तीन बजे सम्म पनि कार्यक्रम सुरु हुन सकेको छैन । माओवादीको विरोधपछि कार्यक्रमस्थलबाट बोर्ड झिकिएको छ ।

सुरुमा बोर्ड फेर्न माग गरेका कार्यकर्ताहरुले छिटो कार्यक्रम गर्न भन्दै कार्यक्रमस्थलमा नाराबाजी र होहल्ला गरेका छन् । दुबै पार्टीका नेताहरु ब्यानरको विवाद हल गर्न आन्तरिक छलफलमा जुटेका छन् ।

बेग्लाबेग्लै ब्यानर राखेर कार्यक्रम गर्ने सहमति भएकाले अब माओवादीको ब्यानर तयार हुनासाथ कार्यक्रम सुरु हुने एक स्रोतले जानकारी दिएको छ ।