रामेछाप, २५ वैशाख । रामेछापका उमाकुण्ड गाउँपालिका वडा नम्बर –५, लिखु नदी किनारमा भटिएको एक डायरीमा ‘जिन्दगी यस्तै रहेछ, जनताले अध्यक्षले केही गरेन मात्रै भन्छन्’ भन्ने लेखिएको छ । उक्त डायरी उमाकुण्ड गाउँपालिका वडा नम्बर –५, प्रितीका वडा अध्यक्ष कुवेर खत्रीको रहेको प्रहरीले जानकारी दिएको छ ।

नदी किनारमा फेला परेको अध्यक्ष केसीको डायरीमा ‘जिन्दगी यस्तै रहेछ, जनताले अध्यक्षले केही गरेन मात्रै भन्छन्, अझै अध्यक्षले गर्नुपर्ने काम धेरै नै बाँकी रहेको छ । बाँकी रहेका अधुरा कामहरु सबै क्रमशः पूरा गरिदिनु’ लेखिएकोे उमाकुण्ड गाउँपालिकाका अध्यक्ष शेरबहादुर सुनुवारले बताए ।

उनि मंगलबार बिहानदेखि हरायका छन् । सधैँ झैँ मंगलबार बिहानै गाउँपालिकामा ‘कार्यपालिकाको बैठकमा ११ बजे नै पुग्नु पर्ने छ’ भन्दै बिहान ७ बजे नै घरबाट हिँडेका केसी दिउँसोसम्म पनि बैठकमा पुगेनन् । त्यसपछि गाउँपालिकाका प्रमुखलगायतका पदाधिकारीहरुले केसीको मोबाइलमा सम्र्पक गर्दा समेत फोन नउठेपछि अध्यक्ष केसीको घरपरिवारमा सोधखोजपछि खोजी कार्य भइरहेको छ । उनी दश महिनाअघि भएको चुनावमा नेकपा एमालेको तर्फबाट वडा अध्यक्षमा निर्वाचित भएका थिए ।

घरमा सोधखोजपछि परिवारका सदस्यहरुले कार्यपालिकामा बैठक छ भनी बिहानै घरबाट मोटरसाइकल लिएर हिँडेको र त्यसपछि घरमा सम्पर्क नभएको बताएपछि गाउँपालिकाका प्रतिनिधिहरुले उनको खोजी कार्य जारी राखेका छन् । खोजी गर्ने क्रममा उमाकुण्ड गाउँपालिका वडा नम्बर –५, लिखु नदी किनार रोडमा वडाध्यक्ष केसीले चलाएको मोटरसाइकल, लगाएको ज्याकेट, चप्पल, घडी, नोट डायरीलगायतका सामग्री भेटिएकोे प्रहरीले जनाएको छ ।

अध्यक्ष सुनुवारले दिउँसोदेखि नै स्थानीय जनप्रतिनिधिहरु, प्रहरी, स्थानियलगायतको सक्रियतामा वडाध्यक्ष केसीको खोजी कार्य भइरहेको जानकारी दिए ।