काठमाडौं, २५ जेठ । चीनमा ५४६ मिलियन वर्ष पहिले एक प्राणीले बनाएको पदचिह्न भेटिएको छ । यो दक्षिण क्षेत्रमा अहिलेसम्मकै सबैभन्दा पुरानो पदचिह्न भएको अनुमान गरिएको छ ।

फेला परेको पदचिन्ह कुन प्राणीले बनाएको हो भन्ने खुलेको छैन । त्यहाँ भेटिएको जीवावशेषमा दुई लाइन पदचिह्नहरु देखिएका छन् । त्यतिबेलको समयमा पहिलो चरणमा उद्विकास भएका जनावरहरुको उत्पति भैरहेको थियो ।

त्यो जीवावशेष दुई खुट्टा भएको जनावरको भएको र त्यो पदचिह्न खुट्टा भएको जनावरको सबैभन्दा पुरानो पदचिह्न भएको बीबीसीले उल्लेख गरेको छ ।

अनुसन्धानमा संलग्न व्यक्तिहरुका अनुसार त्यो जनावरको दुई खुट्टा भएको वा अन्य धेरै खुट्टा भएको भन्ने खुलेको छैन । उनीहरुले त्यो पदचिह्न टाउको, जीउ, भूँडी र खुट्टाको विकास भएको जनावरको भएको बताएका छन् ।

त्यो चिन्ह घस्रेर हिँड्ने जनावरभन्दा अलि विकशीत जनावरको भएको हुनसक्ने अनुसन्धानमा संलग्न व्यक्तिहरुले बताएका छन् । ढुंगामा भेटिएको सो पदचिह्न ५५१ देखि ५४१ मिलियन वर्ष पुरानो भएको अनुसन्धानमा संलग्न व्यक्तिहरुले अनुमान छ । यो पदचिह्न दक्षिणी चीनको याङत्जे खोंचमा भेटिएको हो ।

यसभन्दा अगाडि पहिचान भएका सबैभन्दा पुराना पदचिह्न ५४० देखि ५३० मिलियन वर्ष पुराना थिए ।