बुटवल, २२ पुस,

नेपाल कम्युनिष्ट पार्टी नेकपाका अध्यक्ष प्रचण्डले प्रधानमन्त्री केपीओली र आफुले सरकार संचालनको बिषयमा गम्भिर समिक्षा सुरु गरेको बताउनुभएको छ ।
बुटवलमा आज सम्पन्न अगुवा कार्यकर्ता भेला पछि एबिसी न्युजसंग प्रतिक्रिया दिंदै अध्यक्ष प्रचण्डले सरकारको समिक्षा प्रधानमन्त्री र आफुले सुरु गरेपनि मन्त्री परिषद पुनर्गठन हुने कुनै सम्भावना नरहेको बताउनुभयो ।
यस अघि बुटवल स्थित नेकपाको ५ नम्बर प्रदेश कार्यालयमा अगुवा कार्यकर्ताहरुलाई सम्बोधन गर्दै एमाले र माओबादी बिचको एकता कुनै प्रतिक्रियाबादीले दिएको बरदान नभएको बताउनुभएको थियो ।
उहांले पार्टी एकता राष्ट्रको समृद्धि र कम्युनिष्ट आन्दोलनको रक्षाका निम्ती भएको स्पष्ट पार्दै सानोतिनो कुरामा अल्झीने बेला नभएको बताउनुभयो । माघ महिना भित्रै पार्टीका सबै तहमा एकता हुने दाबी गर्दै उहांले माघ महिनामै पार्टी केन्द्रको बैठक बोलाएर एकतालाई अनुमोदन गरिने जानकारी दिनुभयो । समयले हरेक ब्यक्तिलाई पाठ सिकाउने बताउंदै अध्यक्ष प्रचण्डले पहिलो संबिधानसभामा माओबादीमा पलाएको दम्भ र एमालेले सिकेको पाठले आफु र केपी ओली पार्टी एकताको चरण सम्म पुगेको बताउनुभयो । उहांले पार्टीको स्थानीय तहमा एकता गर्ने क्रममा सबै जिल्लालाई रुपन्देहीले उछिनेको भन्दै स्थानीय नेताहरुलाई बधाई समेत दिनुभयो ।
प्रदेश कार्यालयमा भेला भएका कार्यकर्ताहरुलाई प्रदेश ५ सरकारका उद्योग मन्त्री लिला गिरिले स्वागत गर्नुभएको थियो ।