सिउल , २४ पुस । उत्तर कोरियाका नेता किम जङ उन आज बिहान सबेरै चीनको राजधानी बेइजिङ पुगेको दक्षिण कोरियाली सञ्चार माध्यमले जनाएका छन् । द कोरियन सेन्ट्रल न्यूज एजेन्सीले उनी सोमबार चीनका लागि प्रस्थान गरेको पुष्टी गरेको छ ।

उनी चीनका राष्ट्रपति सी जिनपिङको निमन्त्रणमा चार दिने भ्रमणका लागि चीन गएको समाचारमा जनाइएको छ । उनी रेल चढेर उत्तर कोरियाली सीमा पार गरी सोमबार राति त्यसतर्फ प्रस्थान गरेका हुन् । किम र अमेरिकी राष्ट्रपति डोनाल्ड ट्रम्पबीच दोस्रो शिखर सम्मेलनको तयारी भइरहेको बेलामा उनको यो चीन भ्रमण भएको बताइएको छ ।

चीनको सरकारी समाचार एजेन्सी सिन्ह्वाले भ्रमणबारेमा पुष्टी गरेपनि के विषयमा छलफल हुन लागेको भन्ने बारेमा नखुलाएको समाचारमा जनाइएको छ । भ्रमणको बारेमा पहिलो पटक दक्षिण कोरियाको हान्क्योरेह न्यूज पेपरले समाचार ब्रेक गरेको थियो । ट्रम्पसँग शिखर सम्मेलन हुनुअघि किमले गएको वर्ष तीन पटक चीनको भ्रमण गरेका थिए ।