काठमाण्डौं, १२ काक्तिक । इंग्लिस प्रिमियर लिग फुटबल अन्तर्गत शनिबार राति भएको खेलमा म्यानचेस्टर युनाइटेड विजयी भएको छ ।

घरेलु मैदानमा भएको खेलमा म्यानचेस्टर युनाइटेडले टोटनह्यामलाई १–० ले हराएर महत्वपूर्ण तीन अंक जोडेको हो । निकै प्रतिस्पर्धात्मक भएको खेलमा जितका लागि म्यानचेस्टर युनाइटेडले खेलको अन्तिम समयसम्म पर्खनु परेको थियो । यो सिजनका सर्वाधिक गोलकर्ता स्टार स्ट्राइकर ह्यारी केन बिना मैदान उत्रिएको टोटनइह्यामले युनाइटेडलाई निकै कडा चुनौती दिएको थियो । पहिलो हाफमा गोलरहित बराबरी भएको खेलमा एन्थोनी मार्शलले ८१ औं मिनेटमा गरेको गोल नै म्यानचेस्टर युनाइटेडको जितमा निर्णायक बन्यो । थप खेलाडीको रुपमा मैदान छिरेका मार्शलले टिमका लागि महत्वपूर्ण गोल गरेका हुन् । जितपछि १० खेलबाट २३ अंक जोडेको युनाइटेड दोस्रो स्थानमा रहेको छ । शीर्ष स्थानको म्यानचेस्टर सिटीको २८ अंक छ । २० अंकसहित टोटनह्याम तेस्रो स्थानमा रहेको छ ।