काठमाडौं । गृहमन्त्री सुधन गुरुङले युवाहरूलाई जीवनदेखि हरेस नखान आह्वान गरेका छन् । राष्ट्रियसभाको प्रश्नोत्तरमा बिहीबार सहभागी भएका मन्त्री गुरुङले सांसद विष्णुबहादुर विश्वकर्माको प्रश्नको जवाफ दिने क्रममा युवाहरूलाई जीवनदेखि हरेस नखान आह्वान गारेका हुन् ।

‘समाजका युवापुस्तामा बढिरहेको आत्मदाह र आत्महत्या जस्ता घटना रोक्न सरकारले के के गर्दै छ ?’ भन्ने आशयमा सांसद विश्वकर्माले प्रश्न सोधेका थिए ।

जवाफमा उनले तीन तहकै सरकारको समन्वयका लागि काम भइरहेको बताए । “यसका लागि तीन तहका सरकार मिलेर काम गर्नुपर्ने हुन्छ । युवाहरूमा दबाब र निराशा पनि सृजना भएको छ । यसका लागि तीनवटैै सरकार मिलेर समन्वयमा काम गर्न एउटा योजना बनाइरहेका छौँ । समन्वय भइरहेको छ,” मन्त्री गुरुङले भने, “आत्महत्या रोकथामका लागि हेल्पलाइन पनि सञ्चालन गरेका छौँ ।”

त्यसपछि उनले युवाहरूलाई आफू पनि युवा भएको भन्दै जीवनदेखि हरेस नखान आग्रह गरे । संघर्ष नै हाम्रो संस्कार भएको भन्दै दुःखलाई स्वीकार गर्दै अघि बढ्नुपर्ने बताए । “युवा भएको नाताले सम्मानित सदनबाट भन्न चाहन्छु – हामीले हरेस खानु हुँदैन रहेछ । जीवनमा संघर्ष गरिरहनुपर्ने रहेछ,” गुरुङले भने, “संघर्ष हाम्रो संस्कारमै आएको छ । दुःख नभएको मानिस हुँदैन । दुःखलाई नै बल बनाएर अघि बढ्नुपर्छ ।”

उनले युवाहरूलाई खेल र अन्य क्षेत्रमा सहभागी गराएर व्यस्त बनाउने र सृजनात्मक रूपमा सक्रिय बनाउने सरकारको लक्ष्य रहेको बताए । उक्त लक्ष्य हासिल गर्न पनि तीन तहकै सरकारको समन्वय आवश्यक पर्ने उनको भनाइ थियो । मन्त्री गुरुङलाई विश्वर्माले मात्र दुईवटा प्रश्न सोधेका छन् ।

Originally published on abcnews.com.np.