काठमाडौं । सरकारले भदौ ७ देखि १३ गतेसम्म काठमाडौंमा आयोजना हुने तय भएको तिब्बती अध्ययनसम्बन्धी अन्तर्राष्ट्रिय सम्मेलन स्थगित गर्न निर्देशन दिएको छ। चार वर्षदेखि तयारी भइरहेको सम्मेलन अन्तिम समयमा रोकिएपछि त्यसको कारणलाई लिएर विभिन्न अड्कलबाजी सुरु भएको छ।

स्रोतका अनुसार केही समयअघि चिनियाँ राजदूतले परराष्ट्र सचिव अमृतबहादुर राईसँग सम्मेलनबारे छलफल गरेका थिए। तर, उक्त भेटमा सम्मेलनप्रति कुनै आपत्ति भने नजनाइएको परराष्ट्र मन्त्रालय स्रोतले जनाएको छ।

सरकारले भने सुनसरीमा विकसित पछिल्लो अवस्थालाई कारण देखाउँदै सम्मेलन स्थगित गर्न निर्देशन दिएको बताइएको छ।

सम्मेलनमा ३९ देशका तिब्बत अध्ययनसम्बन्धी विज्ञ तथा अनुसन्धानकर्तालाई निमन्त्रणा गरिएको थियो। हालसम्म १५ देशका प्रतिनिधिले सहभागिता सुनिश्चित गरिसकेका थिए।

परराष्ट्र सचिव राईसँगको छलफलपछि मुख्यसचिव गोविन्दबहादुर कार्कीले काठमाडौं विश्वविद्यालयका पदाधिकारीलाई फोनमार्फत सम्मेलन स्थगित गर्न निर्देशन दिएको स्रोतको दाबी छ।

काठमाडौं विश्वविद्यालयका रजिष्ट्रार राजीव श्रेष्ठले सरकारबाट सुनसरी घटनालाई कारण देखाउँदै कार्यक्रम रोक्न भनिएको पुष्टि गरे।

“सुनसरी घटनालाई देखाएर सरकारले यो कार्यक्रम रोक्न भनेको छ,” उनले भने।

श्रेष्ठका अनुसार सम्मेलनका सबै तयारी पूरा भइसकेका थिए र १५ देशका प्रतिनिधिको सहभागिता सुनिश्चित भइसकेको थियो। सरकारको निर्देशनपछि अब थप निर्णयबारे छलफल भइरहेको उनले बताए।

यता, परराष्ट्र मन्त्रालयका एक स्रोतले भने सम्मेलनलाई चीनसँग जोडेर स्थगित गर्नुपर्ने अवस्था नरहेको जनाएको छ।

“चीनबाटै सयभन्दा बढी प्राध्यापक सहभागी हुने तयारी थियो,” स्रोतले भन्यो।

Originally published on abcnews.com.np.