महोत्तरी । पर्याप्त वर्षा नहुँदा महोत्तरीका धान किसान सिँचाइ अभाव, रासायनिक मलको कमी र सिँचाइ उपकरण चोरीका कारण दोहोरो–तेहेरो समस्यामा परेका छन्।

वर्षा कम भएपछि किसान स्यालो ट्युबवेलमार्फत मोटर चलाएर सिँचाइ गर्न बाध्य छन्। यसले डिजेल, विद्युत् र मजदुरी खर्च बढाउँदा धान खेतीको लागत उल्लेख्य रूपमा बढेको किसानहरूको गुनासो छ। समयमा रासायनिक मल नपाउँदा उत्पादनसमेत प्रभावित हुने चिन्ता बढेको छ।

यस्तै, सिँचाइका लागि प्रयोग हुने मोटर र विद्युत् तार चोरीका घटना बढेपछि किसान रातभर खेतमै बसेर उपकरणको सुरक्षा गर्न बाध्य भएका छन्। हालै महोत्तरी र धनुषामा ट्रान्सफर्मर चोरीका घटनासमेत भएका छन्, जसका कारण केही क्षेत्रमा विद्युत् र खानेपानी सेवा प्रभावित भएको छ।

औरही नगरपालिकाका कृषि शाखाका अनुसार पर्याप्त वर्षा नहुँदा किसान ट्युबवेलमा निर्भर भएका हुन्। मल उपलब्ध हुनेबित्तिकै वितरण गरिने र दीर्घकालीन रूपमा सिँचाइ पूर्वाधार विस्तार गर्ने योजना अघि बढाइएको जनाएको छ।

कृषि विज्ञहरूले धानको प्रारम्भिक अवस्थामा पर्याप्त सिँचाइ र मल व्यवस्थापन हुन नसके उत्पादनमा प्रत्यक्ष असर पर्ने चेतावनी दिएका छन्। उनीहरूले सिँचाइ उपकरण चोरी नियन्त्रणका लागि स्थानीय तह, सुरक्षा निकाय र सम्बन्धित निकायबीच प्रभावकारी समन्वय आवश्यक रहेको बताएका छन्।

Originally published on abcnews.com.np.