काठमाडौँ । नेपाली कांग्रेस संसदीय दलका नेता भीष्मराज आङ्देम्बेले सरकारको नेतृत्व गर्नेहरूबाटै संविधानका उपलब्धिमाथि प्रश्न उठाउने काम भइरहेको आरोप लगाएका छन्।

३२औँ विश्व आदिवासी दिवसका अवसरमा आयोजित कार्यक्रमलाई सम्बोधन गर्दै आङ्देम्बेले संविधानले सुनिश्चित गरेका उपलब्धिमाथि कार्यकारी निकायबाट पटक–पटक ‘घोचपेच’ हुने गरेको बताए। संविधानको रक्षा गर्ने जिम्मेवारी पाएको निकायबाटै यस्ता प्रश्न उठ्नु गम्भीर विषय भएको उनको भनाइ थियो।

संघर्षबाट प्राप्त अधिकार

आङ्देम्बेले संविधानले आदिवासी जनजातिसहित महिला, दलित, मधेसी, मुस्लिम, थारू तथा अन्य सीमान्तकृत समुदायका पहिचान, अधिकार र प्रतिनिधित्वलाई लिपिबद्ध गरेको बताए।

यी उपलब्धि कसैको ‘निगाह’बाट प्राप्त नभएको उल्लेख गर्दै उनले विगतका पुस्ताले लामो संघर्ष गरेर अधिकार स्थापित गरेको बताए।

उनले भने, ‘कार्यकारी निकायबाटै हामीले प्राप्त गरेको उपलब्धिमाथि जानेर हो या नजानेर, घरीघरी घोचपेच भइराख्दा यसमाथि उत्पन्न भएको शंकाको कालो बादल हटिसक्यो भनेर ढुक्क भएर बस्ने अवस्था छैन।’

उपलब्धि संरक्षणमा एकता आवश्यक

संघर्षबाट प्राप्त उपलब्धिलाई राजनीतिक भाषण गर्ने वा भीड जम्मा गर्ने विषय मात्र बनाउन नहुने आङ्देम्बेले बताए।

उनले आदिवासी जनजाति समुदाय आफ्ना अधिकारको संरक्षणका लागि एकजुट हुन नसकेको भन्दै असन्तुष्टि व्यक्त गरे। सामाजिक सञ्जालमा अधिकारका विषयमा आवाज उठाउने गरे पनि अधिकार संरक्षणका लागि आवश्यक एकता र शक्ति प्रदर्शन गर्ने समयमा उपस्थिति कमजोर हुने गरेको उनको भनाइ थियो।

अधिकारको रक्षा गर्न समुदाय आफैँ सचेत, संगठित र एकताबद्ध हुनुपर्नेमा उनले जोड दिए।

संविधान संशोधनमा सबै समुदायका माग समेट्न आग्रह

२०७२ सालमा संविधान जारी हुँदा देशका केही भागमा दीपावली गरिएको र केही ठाउँमा संविधान जलाइएको अवस्था स्मरण गर्दै आङ्देम्बेले आगामी संवैधानिक अभ्यास तथा संशोधनका क्रममा असन्तुष्ट समुदायका माग सम्बोधन गर्नुपर्ने बताए।

संविधान संशोधन गर्दा आदिवासी जनजाति, महिला, दलित, मधेसी, मुस्लिम, थारू तथा अन्य सीमान्तकृत समुदायसँग गरिएका प्रतिबद्धता समेटिनुपर्ने उनको भनाइ थियो।

सरकारले गठन गरेको समितिका विषयमा नेपाली कांग्रेसको केही ‘रिजर्भेसन’ रहेको उल्लेख गर्दै उनले आदिवासी जनजाति समुदायले पनि यस विषयमा गम्भीर भएर ध्यान दिनुपर्ने बताए।

संसद् र सडकबाट खबरदारी गर्ने कांग्रेसको प्रतिबद्धता

दोस्रो जनआन्दोलनबाट प्राप्त उपलब्धिमाथि अझै प्रश्न उठिरहेको आङ्देम्बेले बताए।

धर्मनिरपेक्षता, संघीयता, प्रदेश संरचना तथा समानुपातिक समावेशी प्रतिनिधित्व संविधानको मूल मर्म भएको उल्लेख गर्दै उनले संविधानप्रदत्त अधिकार सुनिश्चित गर्न नेपाली कांग्रेसले सरकारलाई संसद् र सडक दुवैबाट खबरदारी गर्ने बताए।

नेपाली कांग्रेस निरन्तर आदिवासी जनजाति समुदायको साथमा रहने प्रतिबद्धतासमेत उनले व्यक्त गरे।

Originally published on abcnews.com.np.