काठमाडौं । राज्य व्यवस्था तथा सुशासन समितिका सभापति एवं राष्ट्रिय स्वतन्त्र पार्टी (रास्वपा)का सांसद हरि ढकालले मुलुकको प्रमुख प्रशासनिक केन्द्र ‘सिंहदरबार’को नाम परिवर्तन गर्नुपर्ने प्रस्ताव राखेका छन्।

ललितपुरमा आइतबार आयोजित कार्यक्रममा बोल्दै ढकालले राजनीतिक परिवर्तनपछि देशका विभिन्न स्थान तथा विमानस्थलको नाम परिवर्तन भए पनि सिंहदरबारको नाम भने यथावत रहेको भन्दै प्रश्न उठाए।

नेपालमा सिंह नपाइने उल्लेख गर्दै उनले ‘सिंहदरबार’ नामको सान्दर्भिकतामाथि प्रश्न गरेका हुन्। उनले सिंहदरबारको नाम मात्र नभई यसको कार्यशैली, भाषा र प्रवृत्तिमा समेत परिवर्तन आवश्यक रहेको बताए।

ढकालले प्रशासनिक केन्द्रमा अझै पुरानो शैली, सोच र भाष्य कायम रहेको भन्दै त्यसलाई परिवर्तन गर्नुपर्नेमा जोड दिए।

उनले भने, ‘हामीसँग सिंह छैन। तर सिंहदरबार भन्ने नाम अझै छ। परिवर्तनपछि दुनियाँ ठाउँका नाम परिवर्तन भए, तर सिंहदरबारको नाम परिवर्तन भएन।’

सिंहदरबारलाई ‘अनामनगर दरबार’ नाम राख्न सकिने विकल्पसमेत उनले प्रस्तुत गरे।

सांसद ढकालका अनुसार प्रशासनिक केन्द्रको नाम परिवर्तनसँगै यसको काम गर्ने शैली र प्रवृत्तिमा समेत सुधार आवश्यक छ। उनले राज्य सञ्चालनको ‘मुहान’मै सुधार गरेर पुरानो सोच र कार्यशैलीलाई बदल्नुपर्ने बताएका छन्।

Originally published on abcnews.com.np.