काठमाडौँ । भ्रष्टाचार मुद्दामा दोषी ठहर भएका पूर्वमन्त्री गोविन्दराज जोशी अब जेल बस्न नपर्ने भएको छ। सर्वोच्च अदालतले दुई वर्षअघि ९ महिना कैद र जरिवाना तोकेका जोशीलाई ज्येष्ठ नागरिकका लागि कानुनमा रहेको कैद छुटको व्यवस्था लागू हुने भएको हो।

विशेष अदालतका न्यायाधीश नारायणप्रसाद पौडेल, हेमन्त रावल र उमेश कोइरालाको इजलासले शुक्रबार जोशीले दिएको कैद छुटसम्बन्धी निवेदनमा बहुमतबाट आदेश गरेको हो। जोशीले असार २४ गते ७५ वर्षमाथिका ज्येष्ठ नागरिकले पाउने कैद छुटको सुविधा माग गर्दै निवेदन दिएका थिए।

कानुनी व्यवस्थाअनुसार ७५ वर्ष उमेर पूरा गरेका ज्येष्ठ नागरिकले कैद सजायमा ७५ प्रतिशतसम्म छुट पाउन सक्छन्। जोशीले अख्तियार दुरुपयोग अनुसन्धान आयोगको अनुसन्धानका क्रममा ३ महिना १७ दिन हिरासतमा बसेको उल्लेख गर्दै बाँकी कैद छुटको माग गरेका थिए।

जोशीलाई कैद छुट दिन मिल्ने वा नमिल्ने विषयमा विशेष अदालतका न्यायाधीशबीच भने मतभेद देखिएको थियो। न्यायाधीश पौडेल र कोइरालाले कारागारमा नरहे पनि ज्येष्ठ नागरिकले कैद छुट पाउन सक्ने राय राख्नुभएको थियो। तर न्यायाधीश रावलले भने कैद छुटका लागि पहिले कारागारमा बसेर निवेदन दिनुपर्ने मत राख्नुभएको थियो। दुई न्यायाधीशको बहुमतका आधारमा जोशीलाई जेल नबसी कैद भुक्तान गर्न पाउने आदेश भएको हो।

सर्वोच्च अदालतले २०८१ साउन १३ गते जोशीलाई ९ महिना कैद र ६९ लाख २६ हजार २३८ रुपैयाँ जरिवाना सुनाएको थियो। यसअघि विशेष अदालतले २०६९ साउन १० गते उनलाई १ वर्ष ६ महिना कैद तथा २ करोड १६ लाख १४ हजार ३७६ रुपैयाँ ४१ पैसा जरिवाना तोकेको थियो।

विशेष अदालतको फैसला पुनरावलोकन गर्दै सर्वोच्चले कैद र जरिवाना दुवै घटाएको थियो। जोशीले अनुसन्धानका क्रममा भोगिसकेको ३ महिना १७ दिनको थुनासमेत समायोजन हुने र ज्येष्ठ नागरिकका रूपमा बाँकी कैदमा छुट पाएपछि अब उनले कारागार गएर थप कैद भुक्तान गर्नुपर्ने छैन।

Originally published on abcnews.com.np.