विराटनगर । जिल्ला प्रशासन कार्यालय मोरङले एलपी ग्यासको वितरण व्यवस्थापनमा अनियमितता गर्ने तथा बजार अनुगमनमा सहयोग नगर्ने उद्योग र व्यापारीमाथि कारबाही प्रक्रिया अघि बढाएको छ।

मोरङका सहायक प्रमुख जिल्ला अधिकारी तथा सूचना अधिकारी पवनराज कोइरालाका अनुसार बुढीगंगा गाउँपालिका–४ मा रहेको कोसी ग्यास उद्योग प्रालिमा गरिएको अनुगमनका क्रममा गम्भीर लापरबाही भेटिएपछि कारबाही प्रक्रिया अघि बढाइएको हो।

अनुगमनका क्रममा अत्यावश्यक सेवाअन्तर्गत पर्ने ग्यास उद्योग सञ्चालनमा नरहेको पाइएको कोइरालाले बताए। उद्योग परिसरमा रहेका १४३ वटा भरिएका सिलिन्डरमध्ये ६४ वटाको तौल परीक्षण गर्दा ग्यासको तौलमा गम्भीर अनियमितता भेटिएको प्रशासनले जनाएको छ।

तौल परीक्षण गरिएका सिलिन्डरमध्ये एउटा सिलिन्डरमा १३.७४५ केजी मात्रै ग्यास रहेको पाइएको थियो। त्यसपछि उद्योगलाई तत्काल २ लाख ९० हजार रुपैयाँ जरिवाना गरिएको कोइरालाले जानकारी दिए।

त्यस्तै, परीक्षण गरिएका बाँकी ६३ वटा सिलिन्डरमा समेत औसत तौल १४.१८५ केजी मात्रै पाइएको थियो। निर्धारित मापदण्डभन्दा कम ग्यास भरिएको पाइएपछि उद्योगमाथि थप कानुनी कारबाहीको प्रक्रिया अघि बढाइएको प्रशासनले जनाएको छ।

अनुगमनका क्रममा उद्योगमा रहेका खाली सिलिन्डरको तौल परीक्षण गर्दा समेत अनियमितता भेटिएको थियो।

प्रशासनका अनुसार १० वटा खाली सिलिन्डरमध्ये ९ वटाको तौल तोकिएको मापदण्डभन्दा १०० देखि १५० ग्रामसम्म बढी पाइएको थियो।

खाली सिलिन्डरको तौल नै बढी देखाएर त्यसमा कम तौलको ग्यास भरी बिक्री वितरण गर्ने गरेको देखिएपछि उद्योगमाथि थप कारबाही प्रक्रिया अघि बढाइएको हो।

प्रशासनले उपभोक्ताले खरिद गर्ने ग्यासको वास्तविक तौल सुनिश्चित गर्न नियमित अनुगमनलाई थप प्रभावकारी बनाउने जनाएको छ।

अनुगमनमा सहयोग नगर्ने व्यापारीलाई पनि जरिवाना

यसैबीच, बजार अनुगमनका क्रममा विराटनगर महानगरपालिका–७ स्थित श्रीकृष्ण ट्रेडर्सले जाँचबुझ तथा निरीक्षण कार्यमा सहयोग नगरेपछि प्रशासनले ११ हजार रुपैयाँ जरिवाना गरेको छ।

जिल्ला प्रशासन कार्यालयले एलपी ग्यासको आपूर्ति, वितरण तथा तौलमा हुन सक्ने अनियमितता नियन्त्रण गर्न बजार अनुगमनलाई तीव्रता दिएको जनाएको छ।

ग्यासजस्तो अत्यावश्यक वस्तुको आपूर्ति व्यवस्थामा कृत्रिम अभाव, कम तौल वा वितरणमा अनियमितता गर्ने उद्योग तथा व्यवसायीमाथि कानुनअनुसार कारबाही गरिने प्रशासनको भनाइ छ।

Originally published on abcnews.com.np.